الرؤى حق ومن الله وهي جزء من النبوة بمعنى إنها خبر صادق من الله والناس في الرؤى ثلاث أصناف

صنف ينكرها ويسخر منها !

وصنف تاني غارق فيها وكل حلم عنده لازم يكون له تفسير ومستغل من الناس اللي بتاجر بتفسير الأحلام وبتبيع للناس الأوهام من خلال تفسير أضغاث الأحلام

وصنف وسط بين الصنفين لاهو منكر ساخر ولا هو غارق واهم .

ومن الرؤى التي لا أنساها رؤيا شوفتها في سنة رابعة جامعة وكان ليا صديق خاطب زميلة لينا في الجامعة فشفت إن أحنا الثلاثة ماشين على سقف بيت والسقف خشبي ومتهالك جدا وضعيف لأشد درجة حتى إني كنت خايف يقع بينا!

كنت ماشي في المقدمة وصديقي ماشي ورايا وخطيبته وراه

ومن كتر خوفي لسقف يقع بينا طلبت منهم إن إحنا ننام على بطننا ونكمل طريقنا من الوضع زاحفا!

أنا فسرت الرؤيا إن الجوازة دي مش كويسة ليهم هما الاتنين ومحكوم عليها بالفشل!

ولكن كنت متردد أقول لصديقي الرؤيا لأنه كان خاطب من فترة وأجر شقة واشتروا معظم العفش ومفضلش غير نخلص الامتحانات ويحددوا موعد كتب الكتاب!

وكنت في أيام الامتحانات بذاكر عند صديقي وبنام عنده ففي يوم كنا سهرانيين بنذاكر ونزلنا نصلي الفجر فقررت أحكي لزميلي الرؤيا وفعلا حكيتله وقلتله أنا رأي إنك متكملش في الجوازه دي ! صديقي طبعا انزعج جدا وقالي أنت جاي تقولي كده دلوقتي ؟!!!

ده أحنا خلاص مش ناقص غير نحدد موعد الجواز !

قولتله والله أنا شفت الحلم ده واعتقد إنه رؤيا وكنت لازم أقولك لأني اعتقد انها رسالة لك من الله وإنت بقه حر !

المهم موعد كتب الكتاب اتحدد وحضرت الفرح وروحت باركتله في الصباحية ومن تاني يوم جواز بدأت المشاكل اللي انتهت بمشكلة كبيرة خلت صديقي راح طلق مراته غيابي بعد سنة واحدة فقط من الجواز بعد ما خلفوا طفل كان للأسف هو الضحية والخاسر الأكبر في هذه الزيجة الفاشلة!

افتكرت الرؤيا النهاردة بعد اتصال جاني من زميلتي أم الطفل وزوجة صديقي السابقة وكانت بتحكيلي عن مشاكل المراهقة

اللي بيمر بيها الولد اللي بقه عمره النهاردة 15 سنة تقريبا

وأد إيه وهو في السن ده محتاج لأبوه أكتر من احتياجه ليها

ربنا يبارك فيه ويارب صديقي وزميلتي ينسىوا أي مشاكل قديمة ويتعاونوا الاتنين في احتواء ابنهم في الفترة الصعبة والمهمة من حياته.