ملعونة أبوكِ يا غُربة فرقتِ بين لاحباب فك يا رب الكُربة عن القلب اللي داب الفصل السابع الفقر زاد والضيق سكن بيت سعيد، فكرت فاتن في حل مالاقتش غير السفر، لازم سعيد يسافر علشان عياله يعيشوا. القرايب كانوا مقاطعين فاتن لكنهم مش مقاطعين سعيد، كان يوماتي يزورهم وهو شايل مليحة على كتفه، كان أول ما يدخل عنديهم يجروا الحريم يغسلوا لها وشها؛ لجل ما يسيحوا المكياج، لكنهم كانوا بيكتشفوا إن جمالها رباني، فبتزيد غيرتهم أكتر ويحقدوا عليها أكتر وأكتر. ترجع من الزيارة تشيل الطين وتبكي لحد ما عيون الغزال تقلب دم، كل دا ولساتها في عُمر الـ 5 سنين، كان سعيد بيرجع هو كمان متنكد ويتخانق مع فاتن من غير سبب وممكن يوصل للضرب. عرف إن أهله بيحقدوا على بنته، خصوصًا بعد ما أخته الوسطانية وبخته وقالت: ليه عاد طاير بيها كدا من الفرحة؟! ليه ما خلفتش غير مليحة؟ رجع بمليحة البيت، مليحة بتصرخ من غير سبب وبتقطع في شعرها لحد ما سعيد ضربها، كانت أول مرة تشوف غضب سعيد وهو بيضربها. بعد ما ضربها سكتت خالص ودموعها لساها جارية، سعيد حزن وقلبه وجعه عليها، خرج ورجع وفي إيده الملبن اللي مليحة بتحبه، كانت لما تشوفه تجري على سعيد تبوسه وتاخد منه الملبن تاكله وتأكله حتة صغيرة وتنفخ دقيق الملبن وتضحك لما تكركر. لكن المرة دي سعيد قبّل يدها وراسها ومسح دموعها، واداها الملبن، بس هي ما أكلتوش، خدته منه وبعدت عنه ورمته في الأرض. عرف سعيد إن إخواته بيأذوا بنته فما بقاش يزورهم بيها، كان بيخرجها معاه في أي مكان، كانت في عُمر الـ 5 سنين لكن قوامها أكبر من سنها. زادت ملاحتها للقريب والبعيد واللي ماشي على الطريق، لدرجة بقى يجيها الخُطاب من هنا وهناك، لكن سعيد كان بيرفض ويقول: مليحة هتتعلم. كانت هادية ورومانسية، رقيقة وحنونة، كان يعاملها كيف الفراشة من شدة رقتها ولُطفها. كانت زي أبوها في زمانه، إذا شفتها حسبتها من مواليد أرقى أحياء القاهرة، مش من مواليد الصعيد تحديدًا بيت عبد العزيز. كان يدلعها دايمًا حتى اسمها ما كانش ينطقه غير بالدلع، ويقول قدام الناس وفي كل مكان دي الأميرة مليحة بنتي. كان يناديها بأم أبوها كل ما بتكبر؛ لشدة حنانها عليها، يقولها: سيدنا النبي صلى الله عليه وسلم، كان بيقول لسيدتنا فاطمة يا أم أبيها، وأنتِ يا مليحة أم أبوكِ. كانت تنام مخدتها هي دراع أبوها، وأول ما تصحى تفتح عينيها تشوف ضحكة أبوها مستنياها، تجري عليه وتقول له: صباح النور يا دادي. يقولها بسعادة وفرح: صباح النور على البنور يا بابا يا نور عيوني. في مرة أخدها هي وفاتن لمطعم على النيل، أكلوا الأكل اللي هي اختارته "لحمة مشوية ورز وطحينة وسلطات وحلوا بمهلبية بيضا باللبن والمكسرات". كان المنظر وقتها يرد الروح، كانت لابسة فستان أبيض جميل وشيك، وفاتن عاملة لها تسريحة شعر شيك. النيل والخُضرة والسما زرقا، والأمن والأمان. لكن دي كانت آخرة مرة تخرج معاه فيها في حياتها.. ما كانتش تعرف بكرا مخبيلهم إيه؟! مريم توركان 20/5/2026
خبر عاجل: تم توثيق الموضوع:
«الجمال إمرأة»
تم التوثيق منذ:—

