سامحنى بوست طويل

 

= الاردن زى كل دول العالم بتعاني من مشاكل اقتصادية .. ملك الاردن لم يلوم الشعب انه بيخلف كتير او يتهمه انه كسلان ومش بيشتغل .. او طلب من الشعب انه محدش يسمع غير كلامه .. طب عمل ايه الملك؟

 

= فى فبراير الماضى دعى الملك ٥٠٠ من خبراء الاقتصاد الاردنيين والعالميين لحضور ورش عمل فى قاعات ملحقة بالديوان الملكي .. وطلب منهم عمل رؤية شاملة لتنفيذ حاجتين محددين :

١- تسريع نمو الاقتصاد

٢- كيفية الارتقاء بحياة الأردنيين

 

(الهدف التانى هو الاهم لان لا قيمة لاى نمو اقتصادي اذا لم ينعكس على حياة الشعب).

 

= الملك ادى تعليمات للحكومة بتوفير كل البيانات والمعلومات اللى يطلبها الخبراء وتسهيل مهمتهم .. اخواننا الخبراء دول قسموا نفسهم على ١٧ ورشة عمل .. كل ورشة تختص بمشكلة محددة .. الناس قعدوا ٤ شهور متواصلة يتناقشوا ويدرسوا لغاية ما طلعوا ب ٣٦٦ مبادرة اتجدلوا على ٣ مراحل زمنية للتنفيذ باجمالى عشر سنين .. (الاولى من الان وحتى ٢٠٢٥ ثم الثانية حتى ٢٠٢٩ ثم التالتة حتى ٢٠٣٣) 

 

= عشان ميكونش كلام عام وفنكوش .. حدد الخبراء الاهداف بالارقام واهمها توفير مليون فرصة عمل جديدة (متنساش ان كل سكان الاردن ١٠ مليون فقط) وزيادة الدخل السنوي للمواطن بنسبة ١٠% سنويا ورفع ترتيب اﻷردن في مؤشر التنافسية العالمية ليصبح ضمن أعلى ٣٠% ، وكذلك رفع ترتيب اﻷردن في مؤشر البيئة العالمي ليصبح ضمن أعلى ٢٠% ومضاعفة نسبة الراضين بين اﻷردنيين ليصل إلى ٨٠%

 

= امبارح ملك الاردن عمل مؤتمر .. (مش عشان يناقش او يعدل المبادرات اللى قدمها الخبراء) .. بل اعطى تعليمات مشددة بالتزام الحكومة الحالية وكل الحكومات القادمة بتنفيذ المبادرات كما هي بالنص واعلن كمان التزامه بتوفير التمويل اللازم وقدره ٤١ مليار دينار ..

 

= اللى عملته الاردن ده سبق وطالبت انا بيه عشرات المرات .. ده مش اختراع .. ده اللى بتعمله الدول عند مواجهة المشاكل .. تلجأ للخبراء وليس فقط لرؤية فرد ... امريكا نفسها عملت كده فى وقت ريجان ١٩٨٣ وعملوا تقرير "امة فى خطر " Nation at risk ... والتزمت به كل الانظمة الحاكمة حتى الان وغيروا كل نظم التعليم والإعلام. 

 

=نفس ما فعلته اليونان بعد انهيارها اقتصاديا ونجحت بخطة انقاذ من ثلاث مراحل فى التعافي وبدات الازدهار الان ... وما تفعله اسرائيل فى مؤتمرات هرتسليا الدورية لصياغة الاستراتيجيات كل عشر سنوات لمتابعة ما تم والالتزام بالباقى ... وما فعلته شيلي وكوريا الجنوبية وجنوب افريقيا وعملته زمان اليابان بعد ما اتدمرت فى الحرب العالمية التانية باجتماع مجلس الحكماء ... وغيرها من الدول.

 

= اشكرك انك لسه بتقرا البوست الطويل ده .. فى البوست القادم حقدم مقترح متكامل.