انا الساهي
انا المحتار
انا السابح مع التيار
و كل ذنب باستغفار
و اقول
يا رب اخر نوبة
سامحني و اقبل التوبة
انا العاصي
انا المسكين
انا التايه
مع التايهين
انا الضحية و الجاني
انا اللي الدنيا سارقاني
و مهما اتوب
بعود تاني
و نفسي اكون من الصالحين
انا اللي دموعي مبتنشفش
لكن في عيوني
ما تتشفش
بكايا ف قلبي
و ف روحي
على حالي
يزيد نوحي
و نفسي تتشفي جروحي
و خايف نفسي ما تطاوعش
انا الطمعان ف رب كريم
يرزقني بقلب سليم
و يهدي نفسي
و يشفي الروح
بايده يقدر
يداوي جروح
بعفوه يغفر الذلة
و ايامي تكون احلى
و اقوله اقبلني يا ربي
بحق كونك رحمن و رحيم