معضلة رامز جلال السنوية

باختصار كده ... أنا شخصيا مبعرفش افطر و استمتع بالاكل من غير ما اتفرج عليه و اضحك و اتبسط ... الجميل بردو أن ملايين المصريين و العرب بيشاركوني نفس الحكاية ... ناس بسيطه ..علماء ..وزراء ..شحاتين ..كله كله بيتفرج علي رامز ... و بعد ما تخلص الحلقه و يتكيف .. يقوم ايه بقه ..هابد كلمتين علي الفيس شتيمه فيه و فيه ضيوفه ووفي المتفرجين ...

طيب ... موضوع بقه أن رامز بيهين ضيوفه و الكلام ده ..و ان ازاي يا حسرتاه الناس دي اللي هيا الضيوف يعني .. تقبل بالوضع بالشكل ده مقابل مليون جنيه بس ... الحقيقه بقه الموضوع ما فيهوش اي إهانة تذكر ... ده مقلب و اي مقلب بيبقي كده و اكتر من كده... أنا شخصيا كنت بعمل في اخواتي اكتر من كده و انا صغير ..عادي .. و لولا ظروف العمل و أنهم اتجوزوا كنت استمريت عادي في عمل المقالب فيهم بلا هوادة ... أنا مش شايف الموضوع فيه لا اهانه و لا يحزنون ..

الموضوع فيه حاجه تانيه يا اخوانا ... الموضوع فيه انجذاب جمعي من.حضراتكم وراء اراء السوشيال ميديا ..لا اكثر و لا اقل ... كذا واحد كتب أن اللي بيحصل ده فيه نوع من أنواع الإهانة .و أنه كخ و أنه ما ينفعش .. فالكل استقبل الفكرة و اصبح و مرسل و مردد لنفس الفكرة ... و دي حاجه معروفه في علم النفس .. الانجذاب الجمعي لفكرة ما .. زي فكرة القطيع بتاعة كورونا و جونسون ..

الحاجه الوحيده اللي انا متفق عليها و لفت انتباهي ليها مشرفتي وواستاذتي في الدكتوراه ... و حضرتها طبعا مقدرش أن لا اتفق معاها في الرأي ... أن البرنامج ده بيأثر سلبا علي الاطفال ... و بما اني مؤمن بقدرتي علي اتخاذ القرار ... قررت افطر تالت يوم رمضان من غير ما نتفرج كعائلة علي رامز ..و اني اقنع بناتي أن مفيش رامز جلال النهارده ... فيه عادل امام بس ... الحقيقه بما أن اب قوي الشكيمه و مسيطر ..بنتي الصغيرة قالتلي يا بابا ..خش قوضتك و اتفرج علي التلفزيون بتاعك ... ، بنت الوسطانيه جالها حالة هلع ..ازاي يا بابا تحرمنا من رامز جلال ... و عنيها دمعت ... ، مراتي و بنتي الكبيره بصولي بصات مش مريحة ... ، ... عادي يعني .. الواحد ممكن يرجع في كلامه محصلش حاجه يعني ..

الحل أن اللي مش عاجبه البرنامج يمسك الريموت و يغيرها ... ، يقفل التلفزيون ... ما يفطرش و يمشيها سحور من غير فطار .. اللي يعجبه ...لكن تكرار وصلة كل سنه دي ... و بعدين ما نلاقيش نفر فيكي يا مصر ما بيتفرجش علي رامز !!! ... كلام ما ينفعش .. بيفكرني بالإخوان بالضبط اللي عاملين نفسهم مش متابعين مسلسل الاختيار ...و هما ريحة شياطهم مغطية علي ريحة آراءهم الشاذه ...

اختم بموقف كده حصلي علي السريع ..، كنت راكب قطار من مطار كوبنهاجن بالدينمارك متجه للسويد ... ، المهم ركب جمبي واحد لابس علي راسه طرطور طويل جدا ... كل شويه الطرطور بتاعه يخبط في سقف القطر و شكله عبيط مجنون تافه أو اي مصطلح من المصطلحات بتاعتنا دي .. فانا طبعا بصيت الراجل اللي جمبي في الكرسي التاني المقابل للكرسي بتاعي... ووقلتله شوف الراجل ده بيعمل ايه .. و كان علي وشي ابتسامة استنكار و سخرية ... متوقع طبعا ان الراجل الدينماركي أو السويدي يجاريني في استنكاري و تهكمي ... لكنه قلي : الراجل اللي لابس الطرطور مستمتع كده .. نسيبه يستمتع ... ! ... يعني من الاخر ملكش دعوه بيه ..هو مبسوط .. متبقاش انت بقه الواد الولي عليه ... كان رده بليغ الحقيقه ..

... فعشان ننجز ..اللي مش عاجبه رامز .. يقدر يغير المحطه .. بدون ما يتهم ضيوفه بالوضاعه لقبولهم الظهور معاه ..و لا المتفرجين - من أمثالي و امثالكم - بالتفاهه الدونيه العميقه ... ،.

شغلوا دماغكوا يا جماعة ... كونوا مستقلين ..فكروا ... كل واحد يؤمن بمزاجه الخاص و رغباته التي لا يجب أن تتفق مع رغبات اللي جمبك ... طبعا .. بدون ما ننسي ... تطبق الشروط و الاحكام .... ⁦