كورسات التسويق (الماركتنج) مالية الدنيا في مصر وكتير بيشتغلوا في المجال ده ورغم كده تلاقي التسويق في مصر بعافية شويتين.عارفين ليه؟ لأننا بعد ما بندرس إما بنركن العلم على جنب ونستخدم الفهلوة أو صاحب المُنتج بيفتكر إنه أنصح من كل الخبراء اللي حطوا قواعد التسويق والنتيجة كارثية.
مثلًا من الأساسيات في أي مكان في العالم إنك تحافظ على الزبون الدائم لك بعمل عروض وتخفيضات وهدايا خاصة له، في حين إننا في مصر بنعامله معاملة الزوجة مضمون وموجود وهيروح فين يعني!!
كمان ما بنهتمش إننا نسمع شكوة الزبون الدائم أو نتدخل بسرعة لحل مشكلته برضه لأننا ضامنين وجوده لخد ما نتفاجئ إنه سابنا ولجأ لمكان تاني بيقدم مُنتج بجودة عالية وسعر أقل وخدمة ما بعد البيع أفضل والنتيجة خسرنا زبون مهم ده غير إنه كان ممكن يجيب لنا زباين تانيين.
مافيش حاجة اسمها زبون مضمون ده مش ابن خالتك، لازم تفضل تبذل جهدك عشان تحافظ على زباينك وتزودهم مش تخسرهم.
وإلى اللقاء في ملاحظات تانية.