الأذى بقى في حياتك

 سنة مؤسفة 

مالهوش مكان محدد 

ساكن كل الأماكن 

الفرق في التوقيت 

وأنت تبقى عبيط

 لو آمنت في يوم 

إن راحتك منه

 ممكن تكون جاية 

تداوي أثره الباقي 

والموقف المأزوم 

في كل شق جبان

 حتلاقي حرباية 

وتعبان سمه زعاف 

بقيت بتخاف 

بقيت شايف الأيام 

ومش متشاف 

ومافيش للقصة دي نهاية 

طب تعمل إيه يعني ؟ 

تغيب ....

مامالكش أي حبيب

 حتقعد ليه ؟ 

واللي فكرتهم أحباب 

داسوا على جرحك 

هبدوا بأياديهم الناشفة 

 باب الثقة المكسور 

فانهار قوام فرافيت 

متقدرش تبقى حويط

 لأنك في الأساس غلبان 

والدنيا جنان في جنان

 وأنت مش عاقل 

لكن بقلب بسيط 

أبسط من النسمة

 وأرق م الدمعات 

اللي فات ما ماتش 

اللي فات اتعاد  

بتلتميت صورة 

والنفس مكسورة 

إكمنها شبة 

على رجل مكسورة 

بتحلم تشوف الضي 

لكنه غاب ومقالش 

للقلب عنوانه 

والأسود غطى الكون 

ومص ألوانه 

وأنت مابقيتش تشوف

 من كتر شوف القلب

 اللي عماه وخلاص 

ما بقاش يصدق ناس 

لكن لك راجعة

 لمكانك المقدور 

من غير تعب بيهد

 في قلبك المكسور 

أصدع وقول يارب

 حيتبينيلك سور 

وحواجز من الجامدة 

بعيد عن الحرمان 

وساعتها يمكن تقابل

 في سكتك إنسان

تقدر تصدق قلبه 

يفهم أحاسيسك

ويكون لروحك بيت 

وتنتهي الأحزان 

رانيا