حسنين .... و محاكمة الرئيس

السلام عليكم و رحمة الله

اتصل بي صديقي حسنين ليعرف مني حكم المحكمة علي الرئيس السابق و زملائه في القفص .... لكونه في مكان لا يوجد فيه تلفاز ....

الو : كيف حالك يا محمد ؟
- الحمد لله و انت

- شفت المحاكمة يا محمد
- آه شفتها

- حكمت بايه طمني ؟
- حكمت ببراءة مبارك و حبيب العادلي و بالمؤبد علي مساعدي العادلي السته

- يا خبر اسود ازاي الكلام ده
- مالك فيه ايه .... معترض علي ايه

- انت مش حاسس يا محمد .... الدوله ضحت باللواءات الغلابه المأمورين من العادلي ... عشان يخرج منها مبارك و العادلي زي الشعره من العجينة ... منتهي الظلم
- طيب مش ممكن يكون الحكم موضوعي و ليه اسباب قانونيه ..

- قانونية ايه يا محمد .... دي واضحه زي الشمس .... ضحوا بالصغيرين عشان يخرج الكبار منها .... دي تمثيليه مكتملة الاركان .... انت مش حاسس
- اصبر يا صديقي ... اصل القاضي قال ان اللواءات نفذوا تعليمات بمزاجهم و مبارك و العادلي لم يصدروا تعليمات ليهم

- انت بتصدق يا محمد الكلام ده ... انت راجل طيب .... دي لعبة عشان الكبار يطلعوا منها ... و الغلابه يلبسوها
- طيب هون عليك ... بكره النيابه تطعن علي حكم براءة مبارك و العادلي .... بقولك ايه ... قصدك مين بالغلابه

- صباح الفل يا محمد ... ما خلاص .... الرجاله الكبيره طلعت منها و الغلابه اللوءات الصغيرين لبسوها
- طيب .... بقولك ايه ... فيه خطأ بسيط ...  ... انا غلطت و اتلخبط و انا بنقلك الخبر .... اللي حصل ان مبارك و العادلي اخذوا مؤبد .. و اللواءات اخذوا براءه

انتظرت علي الهاتف حتي يأتيني صوت صديقي ... حسنين كعب الغزال و بعد فتره

- حسنين .... اين انت ... فينك
- ايه يا محمد .. و سايبني احلل الحكم ... و اخبط يمين و شمال ... و عمال تقولي اخبار غلط

- طيب الحمد لله .... ايه رأيك دلوقتي في الحكم بعد ما عرفته مظبوط

لم يجبني ... حسنين

- حسنيين اين انت .. حسنيين .... حسنيين .. اطلع في مكان فيه شبكه ..... حسنيين

- معلش يا محمد اصل دماغي رجعت لفت تاني
- ليه ؟

- بردو الحكم ظالم ....
- ظالم ليه يا حسنيين

- انت مش واخد بالك .... دول ضحوا بالعواجيز اللي ميتين اساسا ... عشان يخرجوا منها اللواءات !!

انتهت المكالمه بيني .... و بين حسنين

و تحياتي لكل حسنين

و اي حسنين في مصر ....

:)