كله بيطلع فى الغسيل

كله بيطلع فى الغسيل

كلمة كنت دايما بأقولها للناس ساعه ما تحصلهم حاجة صعبة و مش قادرين يعدوها
كنت ببساطة بأقولهم "كله بيطلع فى الغسيل"

و خلال فترة من حياتى إكتشفت ان البقع ساعات بتبقى صعبة جداا ، لدرجة انها ما بططلعش فى الغسيل
:)

و ساعات المشاكل أو المواقف الصعبة ( اللى هى البقع) بتبقى صعبة جدااا ، لدرجة انك بتتخيل انك عمرك ما هتعرف تعديها ، او أنك عمرك ما هتعرف تقبلها أو تتصالح معاها أو أو

و فعلا ، اكيد كلنا عدينا على مواقف صعبة فى حياتنا حسينا إن الحياة وقفت أو أننا مش قادرين...

أشاركوا بحاجة بسيطة ، بس فرقت معايا جداا النهردة ، سمعت أغنية ما أعرفاش لحد بيتكلم عن الفراق و الهجر و الحنين و اللذى منه ...

ضحكت و أفتكرت أوقات كتيرة عدت عليا بعد فراق أحدهم ، أوقات كنت لما أسمع اغنية عن الفراق و الهجر ، أتأثر جدا و أفتكر الموقف و من المحتمل أنى أبكى كمان ...

:)

أستغربت أنى دلوقتى بقيت بأضحك ... يعنى البقعة طلعت خلاص ...
(دة مش معناه ان الواحد نسى ، علشان الناس اللى كانت بتقول أن البنى أدم بينسى، أو انه علشان بيضحك يبقى نسى... البنى أدم بيتصالح مع ذكرياته لكن مش بينسى)

المهم ، حسيت أنه فعلا " كله بيطلع فى الغسيل"

بس الفكرة فى الغسيل :)
هل الغسيل بالصابون السائل أو بالصابون القوى ، و لا بالصابون و الكلور
هل فترة الغسيل قصيرة ، يعنى البروجرام السريع ، ولا محتاج "نقع" لفترة طويلة ، علشان البقع تتفتت و تطلع بسهولة فى الغسيل.
و لا محتاجة غلية و كلور و نقع و كله و مساحيق غسيل خاصة ...

يعنى الفن كله فى الغسيل.

و مهما البقع كانت صعبة و مهما طالت عميلة الغسيل ، لازم تثق فى ان البقع هتطلع هتطلع
بس المهم نعرف طريقة الغسيل الصح و نتأكد أن البقعة طلعت و النفسية أرتاحت و بقت ناصعة البياض ( من الداخل كمان ، مش من الخارج بس)

و ساعتها تقدر تقول بقلب جامد :
كله بيطلع فى الغسيل

:)