* اتركوا ذكريات
الاخلاق و الذوق و الطيبه و الحنيه و الكرم .. دول لهم مكانهم .. و لهم اشخاصهم
المكان هو .. البيت
الاشخاص هما .. أهلك كبار و صغيرين
يشوفوا حنيتك و كرمك ..
زمان كان فى فرحه فى البيوت لما الاب يرجع من الشغل ..
انا شفت الاولاد و هما بينطوا و يقولوا :
"هييه بابا جه .. هييه بابا جه"
و شفت الزوجه اللى بتنور اول زوجها ما يدخل البيت ..
بتحس بالراحه و الامان
لكن الان !!!!
كتير من الناس بتلبس قناع الشياكه و الرقى بره البيت ..
و يدخلوا بيوتهم تلاقى وجوم على الوجوه
دخله الزوج بقت زى دخله الهم ..
و دخله الاب بقت دخله النكد و الزعيق ..
فين يا ناس الذكريات الجميله اللى هاتسيبوها لأولادكم
انا مش فاكره من بابا غير عيون بتلمع و ابتسامه طيبه ..
و مش فاكره من ماما غير صداقه و حب و حضن يساع دنيتى كلها ..
و مش فاكره من جدى غير وش هادئ جميل و عقل يسع الكون بحكمته ..
و مش فاكره من جدتى غير الحدوته و الضحكه و الاكله الحلوه ..
ربنا يرحمهم و يبارك فى عمر خالى اللى مش فاكره له غير لعب و خروج و مبادئ .. خالى هو اللى شكل بداياتى .. بذره الوطنيه و الدين هو اللى زرعها .. اجمل هدايا فى كل مناسبه .. نعم الاب و كان العوض
ذكريات البدايات الاولى هى اللى بتعيش جوانا ..
اتركوا ذكريات جميله ..
علشان لما تمشوا يتقال الله يرحمهم و يجازيهم عنا خير ..
بدل ما يتقال ..
راح وانزاح .. ريح و ارتاح
* اتركوا ذكريات تصنع شخصيات سويه
نهلة أحمد