-صباح الخير ياعماد....عماد مالك قالب وشك كده ومش بترد عليا؟
-مفيش يامها..هو انتى كلمتى آمال أختى
-آه..هى اللى اتصلت وكمان قفلت السكة فى وشي وقلت أدبها عليا،وبعدين انت عرفت منين؟
-وكل دا حصل إمتى؟
-امبارح بالليل وانت رجعت متأخر وملحقتش أقولك ..مين اللى لحق يبلغك؟
-أمى..وبتقول انك انتى اللى شتمتى آمال الأول
-أنا!! انت عارف انى مش ممكن أغلط فى حد ..انت حافظنى ياعماد
-ماهو عشان أنا عارفك و حافظك بقول.......
-بتقول إيه سمعنى؟؟
-بقول..بقول يمكن فهمتيها غلط ياحبيبتى
-غلط ..هى بعد ماطردتكم من بيتها انت واخواتك لسه هفهم غلط
-بصى يامها...احنا اخوات مع بعض
-يعنى إيه؟ أطلع انا منها بقي
-مقصدش ..بس متديش الأمور أكبر من حجمها،وتعالى بكرة نروح لآمال البيت نزورها وتعتذريلها..هى عزمانا على الفطار
-إيه..اروح لمين؟ لا يمكن طبعاً ..إلا آمال ..دى لسانها طويل وقليلة الأدب..مش رايحه ياعماد
وفى اليوم التالى
-مها يا مها ..خلصتى لِبس؟ المغرب فاضله ساعه ..يللا بقي آمال اتصلت مرتين
-حاضر ..حاضر..بلَبس الواد ..خلصت أهه..إقفل الحنفيات والغاز وإطفى النور
وعند آمال
-آمال: انا مش هسلم عليكم والله زعلانه منكم أوى..إخص عليك ياعماد ..بقي دا كلام تقوله عليا؟
عماد: خلاص بقي يا آمال انتى الكبيرة
آمال: أيوة طبعاً..انا هكلمك بس عشان خاطر مها..ازيك ياحبيبتى ..عامله ايه كل سنه وانتى طيبه
مها: وانتى طيبة ياقلبي..انا آسفه والله ع الموقف البايخ اللى حصل منى فى التليفون ده
آمال : عيب عليكى دا احنا اخوات
مها: بس فعلاً عندك حق عماد غلطان
عماد: هى بقت كده..خلاص ياستى انا الغلطان وآدى راسك أهه
آمال: لا راسي ولا إيدى..انا مش عاوزة من وشك حاجه،وإيه اللى جايبه ده..تفاح..هو ماله كده؟...مش تستنضف شويه..اتفضلوا الأكل جاهز...دى آخرتها ياعماد انت واخواتك تتفقوا عليا وتطلعونى غلطانه..يرضيكى يامها؟
مها: لا طبعاً مايرضينيش..أنا لسه بقوله امبارح..هو فيه فى أدب وللا ذوء آمال..دى الوحيدة الطيبة اللى فيكم ..دى لسانها بينقط سكر
آمال: تسلمى ياروحى..دوقى البطاطس دي
عماد يهمس ل مها: ياسلااام ع الكدب
مها: اسكت انت
عماد: حاسبي ..هتكسري رجلى
آمال: بس أنا لسه زعلانه من محمد وسعاد ولا هدخُلٌهم بيت تانى دول بيقولوا عليا ان أنا اللى وقفت فى بيع بيت البلد..قوم ياواد اعمل شاى لخالك عماد ومراته
مها: عندك حق ياحبيبتى ..ازاى يقولوا عليكى الكلام ده..دا لولاكى مكنتش البيعة هتمشي ..حقك تزعلى وتقاطعيهم كمان
عماد: ماتخليكى محضر خير يامها
آمال: سيبها ..دى بتقول الحق
عماد: أومال فين جوزك يا آمال؟
آمال: معزوم يا اخويا عند أمه
عماد: طاب ماروحتيش ليه معاه انتى والعيال،وأنا كنتى عزمتينى فى يوم تانى
آمال: أنا لابطيق أمه ولا هى بتطيقنى
عماد يهمس: هو انتوا كلكوا صنف واحد
مها: بتقول حاجه ياعماد؟
عماد: لا .. بقول انا هنزل أشرب الشاى ع القهوة وأرجع آخدك ياحبيبتى..واضح انكم انسجمتوا..ومش عاوز ابقي عزول
وعاد يهمس : ضيعتوا صيامنا الله يخرب بيوتكم
وأثناء العودة
-ياساتر ياعماد أختك دى حقنه..طول القعدة عماله أهديها..أقولها عيب يا آمال ميصحش دول اخواتك..أبداً راسها وألف جزمه لتقاطعهم ..امشي يا واد ياعمر شويه الطريق طويل...اختك دى صعبه اوى ياعماد
-انتى قولتى كده؟! هو حد قالك انى كنت متخدر فى القعدة ..دا انتى ماقولتيش كلمة واحدة ترضى ربنا..عماله تسخنى فيها..إمسكى الواد كويس هنعدى الشارع
-أنا..أبداً والله..انت دايماً ظالمنى كده
-طاب بس متحلفيش
- وبعدين كله لمصلحتك ياحبيبي
- ازاى بقي؟!
- خليتها توافق تضم نايبها فى البيت والأرض على نايبك
- وأنا هستفيد إيه من كده؟
- كله هيبقي بتاعك وكده هتتصرف فيه براحتك...وهى محتاجه فلوس ..دا عندهم فلوس أد كده
- أعوذ بالله منك ياشيخه..انتى عاوزانى آكل حرام ..دا انتى لسه طافحه عندها ..مفيش أصل خالص
-انت اتجننت ..بتغلط فيا؟
- والله انا زهقت..مها..شايفه بيت أبوكى اللى هنااااك ده
- أيوة شيفاه ماله؟
- تروحى تقعدى هناك ومتجيش تانى
- وماله أروح اوى ياحبيبي..آهو أحسن من العيشة معاك
- يللا اتكلى على الله مستنيه إيه؟ ...ايه ده؟ دى آمال جايه تجرى ورانا
آمال: ياعماد ..استنى..نَفَسي اتقطع..عماله أنادى عليكم من بدرى ..نسيت محفظتك ياحبيبي
عماد: وانتى اللى جيباها يا آمال
آمال: اومال وأنا عندى أغلى منك يا اخويا..هو انتوا كنتوا بتتخانقوا ليه..صوتكوا جايب آخر الشارع..خير كفاالله الشر
مها: ههههه...مفيش ياحبيبتى
عماد: لأ فيه...أقولها كنتى بتقولى إيه؟
آمال: خير ياعماد زعلانين ليه؟
عماد: أصلها ياستى بتقول.....
مها: مابقولش...خلاص ياعماد حقك عليا..مش هدايقك تانى
عماد: كانت بتقول.....
مها تهمس: خلاص والنبى أبوس ايدك...أنا آسفه مش هتتكرر تانى
عماديهمس: عاوزك ترجعى البيت تقعدى فيه زى الجزمه مااسمعش نَفَسك تانى
مها: ههههه...حاضر ..انت تؤمر ياحبيبي
آمال: فيه ايه ماتقول بقي ياعماد؟
عماد: ميت مرة أقولها مابحبش البيض اللى بتحطيه فى المكرونة بالبشاميل..وبرضه مُصرة تحطه
آمال: يوة..يخيبكم بتتخانقوا ع الأكل..يللا بقي تصبحوا على خير
وفى البيت
-انتى يابت يامها..يا زفته يا اللى فى البيت..فين السحور
- وطى صوتك هتصحى الواد..زفته فى عينك انت صدقت نفسك وللا ايه..مفيش أكل وغور بقي من وشي
- انتى بتعلى صوتك عليا يامها باين عليكى انتى اللى نسيتى نفسك..دا انتى كنتى هتبوسي ايدي من شوية..صحيح صنف نمرود
- انت تخرس خالص..لحسن اروح فيك فى داهيه النهاردة
- يانهارك اسود ..انتى مسكالى سكينه..اعقلى يامها ..السلاح يطول
- انت هتغور من وشي وللا اقطعك
- خلاص..هغور..بس والله لأربيكى
- غور بقي
***يتبع***