- عماد يللا قوم البس بسرعه عشان نلحق مشوارنا بدرى
- طاب صباح الخير الأول
- صباح الخير ياسيدى يللا بقي عشان نلحق المواصلات
- هو لازم مشوار خالتك ده؟ دى ساكنة فى آخر الدنيا
- أيوة لازم مش كفاية انها اتحجزت فى المستشفى وماسألناش عليها
وأثناء الطريق فى الميكروباص
عماد: هى الأجرة كام ياسطى؟
السواق: خمسة جنية يا أستاذ
مها: ليه خمسة جنية؟! دى كانت تلاته إلا ربع
السواق: ههههه... كانت
مها : الكلام دا من يومين ..إنت فاكرنا أجانب وللا إيه
السواق : وبعدين بأاااه...اللهم إنى صايم..الأجرة خمسةونص ولو مش عاجبك روحى اركبى المترو ابو سبعة جنية ههههه
عماد : خلاص ياسطى اتفضل الفلوس
مها : يتفضل ايه ..دا استغلال ..دا راجل حرامى
السواق: وبعدين فى قله الأدب بتاعتكوا دى
مها : انت راجل نصاب وبتستغل ظروف الناس
السواق: آه انا نصاب وبستغل الظروف ..ماتلم المودام بتاعتك يا استاذ
عماد : خلاص يامها زى بعضه
مها : اهى زى بعضه دى هى اللى طمعت الأشكال اللى زى دى فينا..إيه رأيك احنا مش هندفع غير تلاته جنية للنفر ..البلد فيها قانون
السواق: بقولك ايه يابتاعت الأنون انتى هتدفعى بالذوق وللا ارميكى بره العربية
مها : ترمى مين ياحثالة انت
السواق: الله...انت مالكش كلمة وللا ايه يا أستاذ
عماد: لأ ازاى..ماخلاص بقي يامها
مها: لا مش خلاص لا للاستغلال والاستبداد لا للظلم والقهر ..يانا ياهو النهاردة
السواق: وبعدين يا أستاذ
عماد: أنا معرفهاش
السواق: هى مش تبعك؟
عماد: لا لا دا انا قابلتها صدفه
مها: قابلتنى صدفه ..كده ياعماد..طاب ايه رأيك بقي ياسطى نطلع ع القسم
**أصوات الركاب تتعالى**
خلاص يامدام ندفعلك احنا
ياستى ورانا مصالح
مها : لايمكن أساعده ع الاستغلال
السواق: طاب انزليلى بقي ياحلوة
مها: انت هتعمل ايه ..هتضربنى..انت مجنون..ياعماد
عماد: عندك..لو سمحت دى مراتى،وإوعى تمد إيدك عليها
السواق: بقي كده ..طاب انزل انت ياعم الأمور ..ياطه ياسطوحى ياعمرو..تعالوا ريحولى الزبون ده
عماد: إجرى يامهاااا..وفكرينى أول ما اوصل البيت ابقي أطلقك
***يتبع***