يا شعب نايم ع الرصيف
كما اللي لدغاه عقربة
وناس تستمتع بالصيف
سارقه الرغيف والكهربا
***
يا شعب تحت البلاط
هات يلا وإطلع البرج
واقفز انزل في خلاط
فاضل ايه ف الخرج؟
***
يا شعب يا أبو الصحاب
المشكله فيران الغرب
ناس عدت فوق السحاب
وناس زاد عليها الغلب
***
مستني ايه يا صايم
مستني الكهربا تقطع
خايفها تقطع وانا نايم
وان جات بفاتورة تلسع
***
يا شعب سايق العوج
من كل حاره ميه
قالوا الوطن اتحوج
طلع الوطن حراميه
***
ماهوش عيب اماكن
ولا حتي امكانيات
العيب في من شغلوها
ودخلوا من انهي باب
والامكانيه احتلوها
نيلة ف حظنا الهباب
***
كل الجنيه ما يعوم
كل إحنا ما نغطس
دفعنا الصبر بالرسوم
ومصممين إننا نفطس
***
بحق عبس وتولي وسورة الزلزله والبروج
اللي كنس وما خلي وقال الوطن محووج
هو فعلا الوطن محتاج يبطل يمشي معووج
اكلتوا حتي الحديد يا قوم يأجوج ومأجوج