ورد ايه اللي انت جايبه معاك يا بيه
فين الكباب
الورد يعني مع احترامي اعمل به ايه
و الكرش داب
تدخل عليا مخبي ورا ضهرك بوكيه
طب هات شراب
اهو ع الاقل ف عز بردي اتدفى بيه
وسط الصحاب
او حتى هاتلي طقم صيني و كوبايات
بدل القديم
او حتى جيبلي من الغورية كيس مغات
خليك كريم
او للعيال جوز بطانية و دفايــــــــــات
دي الحالة ج
صارف فلوسك ع الهيافة و الانبساط
اصلك غشيم
الورد يا ابني دة للعيال النص كــــــــــم
هاتلي دهب
و اهو خير وينفع وقت زنقة عليك يعم
حاجة عنب
او حتى هاتلي للفيران لزقة و ســــــم
دة البيت خرب
وردك هيدبل و شكله بكرة هيبقى غم
و انت السبب
فرحان جايبلي ورد احمر و اسمه جوري
طالع قرافة ؟
و تقول مفاجأة و انت حبي و انت نوري
شوف الظرافة🤔
الحب عندي بلطي مشوي و يا بوري
و كمان كنافة
يا راجل افهم م الكلام وجّٓعت زوري
بطل هيافة