من أصعب المشاعر اللى ممكن يمر بيها أى إنسان ف أى مرحله من مراحل العمر بدايه من سن الطفوله و بتبدأ بخيانه الثقة بين الطفل و والديه سواء عن تقديم الإهتمام و الرعايه اللازمة للطفل وصولاً إلى خيانه الصداقة أو خيانه العمل أو حق الجيرة وصولاً إلى الخيانه اللى حقيقى بتكون أصعبهم و أشدهم فتكاً للنفس هى ( الخيانه الزوجيه)
ف الأول هنعرف الخيانه بأنها نقض و إنتهاك للعلاقات بين الأطراف زى ما قلت ف التعريف سواء كان عهد اخوه ، صداقة ، جيران ...
و لكن أقبحها هى نقض عهد الزواج لأن هذا ما قدسه الله فى جميع الأديان السماويه ، و لأنه انتهاك لحقوق الطرف الآخر ، بكل الطرق سواء الفكريه أو الجسدية .
• طيب ايه هى أسباب الخيانه :-
و ليه ممكن أصلا نخون طرف وثق فينا ...
طبعا قبل ما اقول أى سبب للخيانه ف كلها حجج و أعذار واهيه بيخدع بيها الإنسان نفسه علشان يستمر ف الخيانه بدون تأنيب لضميرة و أليكم بعض الحجج اللى انا شخصياً سمعتها من بعض الأشخاص ...
_ أنا معايا إنسان بارد فى مشاعرة مش حاسس بيا .
_ دى مهمله فى نفسها و شكلها ، تعالى شوفى الستات بتعمل ايه فى نفسها علشان تكون حلوة .
_ جوزى مسافر و بيرجع شهر واحد ف السنه .
_ مفيش اى كلام بينا غير الخرس الزوجى الرهيب ، و أى حوار بيجمعنا بيكون عن البيت و الاولاد .
_ غصب عني عينى بتحب اى ست جميله .
_ عمرة ما سألنى ولا اهتم أنا عايزة ايه .
_ انسان بارد ف العلاقه الزوجية .
_ أصلها غاويه نكد و ضاربه بوز طول اليوم .
_ شايف إن شغله اهم منى .
_ يستاهل اخونه زى ما هو خانى .
و اسباب و أعذار كتير جداً لم اذكرها ف المقال .
و لكن تفتكروا أن دى اسباب تخلينى اطعن الطرف التانى بخنجر الخيانه المسموم .
دى اسباب تستحق منى اهين نفسى و جسدى و اغضب الله منى ؟
• هل للخيانه أسباب مرضيه :-
يمكن تتفأجوا لو قلت انها فعلا ليها أسباب مرضية نفسيه فى بعض الحالات و هى :ـ
١ـ ضعف الثقة الشديد بالنفس و دة بيخلى طرف من الأطراف بيدور عن الثقة بالنفس عن طريق عيون الآخرين و كلامهم اللى أغلبه مجرد ادعائات كاذبه ، و تخدير للعقل .
٢ـ مريض العلاقات المتعددة و دة عمرة ما هيكتفى بعلاقه واحدة أبدا ، لكن هتلاقيه متعدد العلاقات الجنسيه كمان للأسف و دة سهل معرفته عن طريق كلامه الغير متناهى عن الجنس الآخر ، و عن نظرات الجنس الآخر ليه .
٣ـ الشخصية النرجسية برغم إنه عمره ما حب ولا هيحب حد و لكن إرضاء لغروره بأنه شخص محبوب و الجميع مولع به و بمفاتنه الجسدية و الشخصية و دة للجنسين سواء ( ذكر او انثى ) .
• طيب نسأل سؤال مختلف و هو ... هل ضمير الخاين مرتاح للفعل دة ؟
مش هكدب عليكم لو قلت انى قابلت النوع اللى راضى جداً و شايف إن دة حقة طالما الطرف التانى مقصر معاه ( و زى ما قلت انها دائماً بتكون حجج واهيه لتخدير الضمير للأستمرار ف الخيانه ) .
و قابلت كمان النوع ( اللى حاسس بتأنيب ضمير رهيب ) و أنه يستحق كمان عقاب من الله على جرم الخيانه .
و لكن كان اصعبهم ف نظرى اللى شايف إن الطرف التانى يستحق إنه يتخان و إن دة أقل عقاب ليه .
طبعا كلها اسباب ف الأول و الآخر اهانه شديدة للإنسان نفسة قبل اهانته الطرف الآخر .
• نتكلم بقى فى أنواع الخيانه :ـ
١ـ فى خيانه جسدية ، و دى اللى قال عنها الله فى كتبه السماويه ( أنها تهز عرش الرحمن ) .
٢ـ خيانه فكريه ( وهى انى احب طرف تانى أو أفكر فى شخص تانى غير الزوج أو الزوجة )
٣ـ خيانه الكترونيه ( اى نوع من أنواع السوشيال ميديا ) .
٤ـ علاقة المدير و السكرتيرة و للاسف مازالت العلاقة دى موجودة إلى الآن .
• ايه هو مدى تأثير الخيانه على الطرف الآخر :ـ
الخيانه بتسبب جرح عميق جداً حقيقى صعب الشفاء منه و فى حالات كتير جداً بتحتاج لتدخل الطب النفسى أو المشورة النفسية علشان تقدر تتجاوز الوجع دة .
و فى حالات تانيه كان الطلاق هو الحل الأساسى و الانفع ليها و طبعا دة بيكون على حساب ( البيت و الاولاد ) .
الخيانه كمان بتسبب ضعف الثقة بالنفس للطرف المخان و سؤال حاله هو أنا قصرت ف إيه معاه علشان اتهان و اتخان منه أو منها .
الخيانه للأسف الشديد الكلام عنها اكتر بكتير من مجرد مقال بيكتب أو محاضرة تتقال عنها .
الخيانه جرحها لا دواء لها صدقونى مهما عدى عليها سنين ، عمر ما جرحها بيتداوى .
أتمنى نفهم أن الخيانه ف الأول و الاخر هى اهانه للنفس قبل ما تكون خيانه للطرف الآخر .
حافظوا على نفسكم من شيطان الخيانه اللى فى اعتقادى المتواضع إنه دخل كل البيوت بجميع الطرق .
أدآم الله حياتكم و بيوتكم فى عناية و حفظ الخالق .