مش من عادتى لما أكون زهقانة أو متضايقة أنى أكل
بس فجأة لقيت نفسى فى المطبخ وبأعمل
أرز باللبن
أول مرة أعمله فى حياتى
ماما هى اللى كانت بتعمله
وأفتكرت لما كانت بتقف تعمله وأدخل اغلس
وأحاول أكل من الأرز قبل ما تحطه فى الكاسات
وكمان أفتكرت إنها كانت أوقات بتحط عليه قرفة
على الوش فا عملت كده ....
وكمان حبيت أحطه فى الكاسات دى علشان بحبهم جدا
علشان الكاسات دى كان بابا اللى جايبها لما كان بيسافر
على المراكب ويروح فرنسا وإسبانيا وإيطاليا
حسيتنى عايزة أعيش جو البيت وأنا صغيرة
أرجع دماغى فاضية .. ومفيش أى حاجة بأفكر فيها
شوية نوستالجيا
مش عارفة بقى الأرز باللبن حايطلع أيه يعنى
بس أنا غلست على نفسى برضه زى زمان
ودوقته قبل ما أحطه فى الكاسات
وتقريبا حلو