قلب الصغير مزيون كسروه بجرح القُربى يا رب أنت السند والعون نهبوا شقاه م الغُربة الفصل الثاني رجع سعيد من العراق بعد ما بنى البيت وفرشه وجهزه بالأجهزة الكهربائية، في وقت كانت الناس فيه مش لاقية تمن لمبة جاز، واللي كان يركب لبيته باب يفتكروه من الأعيان! رجع وهو فاكر إنه خلاص هيكون ليه بيت زي بقية الناس، لكن للأسف لقى اللي ما عملش حسابه. ست الحُسن لمرات سعيد: ادبحي يا ندى دكر البط دا وأنا هدبح له الفرختين دول، دا شقيان ومتغرب بقاله سنين. ندى: حاضر يا مرات عمي، ربنا يسترها عليه ويوصل بالسلامة. دخل عبد العزيز لقاهم مشغولين بالطبخ والنفخ، مسك شنبه الكثيف اللي مالوش زي من كُتر ما هو مغطي على بؤه: طب كويس، انجزوا بس علشان جعان، ولا هتقعدوني لحد الأفندي ما يوصل بالسلامة؟ ست الحُسن ببسمة صافية: أكلك جاهز يا أبو سعد، منين ما تجوع أغرف لك وتاكل. عبد العزيز: طب اغرفي وتعالي ورايا، عايزك. ست الحُسن: حاضر. رجع من الغيط والغضب على وشه قعد واتربع، دخل البيت لقى مرات أخوه بتحمر البط والفراخ، زاد غضبه ونادى مراته بصوت عالي: عايدة! عايدة! عايدة نازلة من فوق بتنهج: مالك يا أخويا، حصل إيه؟ سعد وهو باصص لمرات أخوه بغل وحقد: وإن شاء الله يكون عملتوا حسابنا في الأكل والهلُمة دي كلها؟ عايدة وهي بتحاول تهديه: أومال يا أخويا، دا أنت تاكل وعن حد ما كل. سعد: طب هاتي الأكل وتعالي قبل ما البيت يتزحم. عايدة بدلع: حاضر يا أبو حسن. سعد بهمس: عملتِ الحمام اللي قلت لك عليه ولا نسيتِ؟ عايدة بهمس: كيف أنسى؟! طبعًا عملتهولك، حشيت لك جوزين حمام فريك وحمرتهم بالسمنة البلدي بعد ما دهنتهم زبدة، عشان تاكل وتتبسط. سعد بحماس: طب يلا بسرعة يا عايدة ما تتأخريش. دخل البيت وهو فرحان فرحة الدنيا كلها، جري على أمه اللي خلصت طبخ ونفخ وقعدت بغرفتها تجهز نفسها لاستقبال جوزها وابن عمّها سعيد. أُمّي أنا فرحان قد الدنيا بحالها. ندى وهي بتطبطب عليه: تعيش وتفرح يا وليدي. أمجد وهو باصص لصورة أبوه المبروزة بفخامة وسط الحيطة: أخيرًا هشوفك يا أبوي، أخيرًا هقولك يا أبوي وأنت قدامي مش مجرد صورة في برواز. ندى بعد ما كحلت عيونها: حقك عليا أنا يا ولدي، أبوك اتغرب علشان يعملك مستقبل أنت وأختك أسمهان. أمجد ودموعه نازلة: يا رب يفكر فينا كيف ما بيفكر في أخوه وولاده. ندى بعد ما حضنته: إن شاء الله يا وليدي، إن شاء الله. أومال فين أختك؟ أمجد: قاعدة عند جدّها عبد الحميد بتاكل معاه. ندى ببسمة صافية: ربنا يخليه لينا ولا يحرمنا منه واصل. عدّى النهار وجه الليل بظلامه، رجع الغايب واتغيرت ملامحه، سنين طوال قضاها في الشقا والتعب، وفي الآخر مالوش م الفرح نايب. على صلاة العشاء اترج بيت عبد العزيز بالزغاريد، أهل القرية كلهم اتجمعوا حداه في الدار، يباركوا ويهنوا الغايب الشقيان. دخل سعيد البيت بعد غياب دام لسنين، قعد عند رجل أبوه يقبلها ويطلب رضاه، وقبّل الراس واليمين، وبعدها سمع بكاء أمه فقام وصلب طوله، بص لقاها فاردة درعاتها لصغيرها والدمع سايل كيف المطر على الخدين. حضنت صغيرها الغريب وسط الأحبّة، لجل ما تهون عليه غياب السنين. قبّل يمينها وقال: سامحيني يا ماما. ست الحُسن بعد ما رفعت راسه: قلبي وربي راضيين عنك يا وليدي. انتهت السهرة بعد ما سعيد اتعشى مع أهل القرية وفتح شُنطه ووزع عليهم من خير ربنا، وادى لأخوه وأبوه حاجاتهم، لكنه يا ولداه نسي يبقي حاجة لندى وأمجد وأسمهان. مريم توركان 15/4/2026
خبر عاجل: تم توثيق الموضوع:
ثقافة الاعتذار الغائبة.. لماذا أصبح الاعتراف بالخطأ أصعب من ارتكابه؟
تم التوثيق منذ:—

