قالوا الغُربة مُرّة كان إيه رماني عليها شفتك يا أبوي كام مرة؟ وجع القلوب يبان من عنيها الفصل الثامن تمت مليحة 5 سنين بالتمام والكمال، كانوا أجمل 5 سنين عاشتهم في حياتها كلها، 5 سنين كاملين ضحك ولعب ودلع، 5 سنين كاملين ما فارقتش حضن أبوها، 5 سنين تصبح وتمسي عليه، 5 سنين أحلام سعيدة ووعود وفُسح وخروجات. مليحة كانت متعلقة بأبوها أكتر واحدة في إخواتها، وهو كمان كان متعلق بيها، لكن القرايب ما عجبهمش الحال. كانوا يبعتوا له مرسال، يروح عنديهم ملاك يرجع شيطان رجيم، ضرب وسب وإهانة لفاتن من غير أي سبب! كانوا بيقلبوه عليها ويسلطوه على ولادها، واستمر على كدا الحال. في مرة من المرات كانت فاتن حامل في شهرها التاسع، بتشوف مصالح بيتها وبتصنع من الطين مواقيد، وصنعت فرن وكمان رفوف كيف الأدراج؛ لجل ما تشيل فيهم حاجات المطبخ. صنعت بيوت للطيور علشان ما يموتش من الصهد، فضلت على دا الحال لحد ما جالها إلتهاب مفاصل. وهي بتخبز العيش للعيال وأبوهم، رجع هو من عند إخواته البنتة، راجع كيف النار القايدة، دخل من غير أي سبب ولا مقدمات، ضرب فاتن وهي على وش ولادة. كانت المرة الأولى اللي مليحة تخاف فيها من أبوها، جريت على أمها تدافع عنها، مسكت في جلابيتها وهي بتصرخ مش عارفة إيه اللي بيحصل ولا تعمل إيه وتدافع عن أمها إزاي؟ سعيد كان ما حدش يقدر عليه واصل وقت عصبيته، كان هادي جدًّا لكن لما يتعصب يكون كيف البحر في قلبته. بكت مليحة وصرخت لحد ما ولد عمها وخطيب أختها أسمهان كان معدي وسمع صراخها فدخل، لقى عمه بيضرب أم كارم، خلص ما بينهم وأسمهان كان فوق نزلت وصرخت وقالت له: والله العظيم لو مديت يدك عليها لأطلع وأرمي نفسي من فوق وأجيبلك مصيبة، مالكش صالح بيها أمي دي. أسمهان، بنوتة جميلة، طيبة وقلبها أبيض، فيها مسحة جمال رباني تميزها عن غيرها من البنتة. كانت تحب فاتن كيف أمها ودايمًا تقولها: ما تصبريش عليه، دا أخوه واكله هو وشقاه، وكرهوكِ لما فكرتِ يكون لينا بيت يجمعنا وبيسلطونا عليكِ دايمًا، أنتِ طيبة مش شبههم دول يخافوا ولا يختشوش. أما أمجد فكان بيشتغل ويساعد في البيت، ومدحت كان مدلع، وكارم من صغره وهو بيشتغل ويدي أبوه شقاه. بعد ما الفقر اتحول لقحط، قررت فاتن خلاص إنها تتنازل عن دهبها، جمعت دهبها كله وادته لسعيد وقالت له: خد يا واد عمي دول دهباتي أنت أولى بيهم، طالما كل الأبواب اتقفلت في وشنا يبقى مفيش غير إنك تسافر وتسعى على رزق عيالك، بس دول أمانة عنديك، منين ما ربنا يغير الحال ترد لي الأمانة. قالها: حاضر يا أم كارم، ودول أمانة في رقبتي واجب عليا ردها قبل ما أموت. دهب فاتن كان عيار 21، دهب غالي جدًّا، كان يشتري وقتها شوية فدادين وبيوت ومواشي كمان. خد الدهب باعه واشترى عقد عمل وجدد جواز سفره، ورجع يتغرب من تاني؛ بعد ما أخوه سعد كل شقاه وتعبه. اتفق مع فاتن وكل البيت إنهم ما يصحوش مليحة، لجل قلبه ما يتوجعش على فراقه. صبح الصبح، صحيت مليحة من النوم، دورت على أبوها في كل مكان مالاقتوش، في الآخر قالوا لها سافر برا مصر. بكت مليحة واتحول بُكاها لصراخ، فضلت على دا الحال يوم بليلة من غير أكل ولا شُرب، إذا سمعت بُكاها وشفتها وهي بترتعش م الخوف رق قلبك لحالها، كانت كيف اليتيمة اللي أبوها مات وفارقها. فضلت تستناه يوم ورا يوم، وسبوع ورا سبوع، وشهر ورا شهر، وسنة ورا سنة، لحد ما آلفت غيابه، رحل سعيد وحلت محله فاتن؛ كانت هي الأب والأم لكل البيت، هي رب البيت وعموده، هي السند والضهر. غاب سعيد ولا سأل فيهم، كانت الحاجة دليلة شايلة هم البيت مع بنتها فاتن، تطبخ وتبعت لهم، تخبز وتبعت لهم، والعيال كلهم يروحوا بيتها ياكلوا ويلعبوا ويفسحوا ويرجعوا على النوم. من حُسن حظهم إن ربنا رزقهم بأم صالحة "فاتن" حاملة كتاب الله المجيد، كان يومها كله مشغول ما بين الطاعة وشغل البيت ورعاية الصغار. إذا شفتها حسبتها من بنات الحور، هي النقية التقية بنت الأصول الطيبة. بعد ما سعيد سافر سعد راح البيت واتخانق مع فاتن، وعلى صوته عليها وسبها هي وعيالها، واتهمها إنها عزلت أخوه عنه هو وإخواته البنتة. كان عايز يقعد عيل من عياله بمراته وعياله مع فاتن وعيالها غصب عنها، لكنها وقفت له كيف الأسد وطردته من البيت وقالت له: راجل البيت غايب يا خال، إن كان عنديك حديت أجله لما يعود من غربته بالسلامة، وصل سلامنا لعايدة وباقي الحريم. طبعًا سعد ما سكتش اشتغل هو والحريم تسليط في العيال اللي صبحوا كبار، وحول بيت سعيد لنار قايدة، نكد وخناق ليل ونهار، ما بقوش يصلوا زي عيالها ولا يسمعوا كلامها، ولا حتى يحفظوا القرآن الكريم كيف ما بيعملوا عيالها، حاولت معاهم كتير لحد ما غلبت وبرضيك هما زي ما هما. فوضت أمرها لله، وصبرت حسبةً لله. تمر الشهور ووراها السنين، ويعود سعيد أخيرًا من غربته، رجع ومليحة في الصف الخامس الابتدائي! كانت ما شاء الله عليها، سابقة سنها بمراحل، اتغيرت ملامحها، زادت ملاحتها، بقت كيف بنات الحور زي ما كانوا بينادوها. سعيد كمان اتغير، بقى شايب، غاب السنين الطوال ورجع قعد شهرين ورجع مطرح ما كان. رجع كضيف مش أب، ما يعرفش حاجة عن عياله غير أساميهم وبس، كان ضيف في حياتهم، أما فاتن فكانت هي الأب والأم، عاشت حياة كل واحد فيهم بكل تفاصيلها، كانت هي العوض ليهم عن اليُتم اللي سببه أبوهم. مرت الأيام وبلغت مليحة مبلغ الآنسات، وهنا طغت ملاحتها وأنوثتها وظهرت كشمس أغسطس، زادوا خُطابها أكتر وأكتر من عُمر الـ 14 سنة؛ لسُمعتها الطيبة وأخلاقها العالية، وحُسنها وجمالها. لكنها كانت بتفكر في حلمها وبس ومش شايفة غيره قدامها، تكمل تعليمها ولكل حادث حديث. 21/5/2026
خبر عاجل: تم توثيق الموضوع:
أيام أكتوبر
تم التوثيق منذ:—

