دعت ربها يرزقها بنيّة تكون في الحق قويّة جميلة، مُميّزة مش عادية فكانت المليحة أم عيون بُنيّة الفصل السادس حملت فاتن في وقت ما كانش فيه سونار ولا غيره، لكن يقينها بربها خلاها تتأكد إن اللي في بطنها بنت مش ولد. كانت شهور حملها التسعة من أجمل أيام حياتها الإيمانية، كثفت من الطاعة، زادت من صيامها وقيامها، تناجي ربها ليل نهار، تفعل الخيرات ما شاءت. كانت بتدعي ربنا ليل ونهار يمن عليها ببنوتة مُميّزة، جميلة، قوية في الحق والإيمان، تحب ربها وتكون زاهدة في الدنيا. وإنها تكون أخت ليها وصاحبة، وسند لإخواتها ولكل من يعرفها، وإنها تكون عابدة. دعت ربنا يحفظها من شر الإنس والجان، وأن يضع لها القبول في الأرض، وأن يحميها مطرح ما تكون، وأن يجعلها نبتة حسنة، ويطهر قلبها من كل شر. كانت بتحط يدها على بطنها وتحكي لها عن تفاصيل يومها، وتشاركها كل لحظاتها، وتتلو لها من القرآن ورد يومي، وكمان خصصت لها ورد يومي من السيرة النبوية الشريفة وقصص الأنبياء. اشتد البلاء على فاتن لما سعيد قعد وما بقاش يسافر من بعد ولادة ماجد، كان بيتها مفتوح بخير أبوها الشيخ عز الدين رغم إنه موته. كانت أمها واقفة معاها ومع جوزها علشان ما حدش يشمت فيهم، تربي الطيور وتبعت لها تدبح، وتجيب لهم الخضار وخزين البيت، وتخبز لهم كل فترة. سعيد بقى لا يحتكم على قرش، وعقد الشغل بتاعه خلص وعلشان يرجع تاني محتاج فلوس يشتري عقد جديد. مرت الأيام وبعد قيام وصيام ودعوات كتير ليل نهار، نورت مليحة الدنيا. ولادتها كانت متعسرة جدًّا، في ليلة باردة من فصل الشتاء تحديدًا شهر طوبة، الموافقة ليلة النصف من شعبان، تعبت فاتن وجاها الطلق شديد جدًّا، بكت وصرخت وعلى دا الحال من بعد العشاء لنص الليل، لحد ما جاتها أمها والداية عائشة. فضلت تطلق للساعة 2 صباحًا، الموافق يوم الاثنين واحد من شهر ديسمبر. وأخيرًا جت مليحة الدنيا، لكنها يا ولداه رجعت تاني لحياتها الرحمية، بعد ما نزلت مليحة الداية غلطت في شغلها فمليحة رجعت تاني لبطن أمها! صرخت فاتن من خوفها على وليدتها، صرخت أم زكريا وكمان الداية خافت. دعت فاتن ربها يرد لها وليدتها فاستجاب دعاءها وجت مليحة الدنيا، بس المرة دي بجد. خرجت بصعوبة ووشها ازرق من الخنقة اللي كانت فيها، شافتها أم زكريا فصرخت فكرتها ماتت، لكن الداية طمنتهم إنها عايشة. كانت ولادة متعسرة نجت منها فاتن ومليحة بأعجوبة، وفرحت بيها فاتن ونسيت تعبها. حضنتها وقعدت تبوس فيها، وكأنها أول مرة تخلف في حياتها! سألتها الداية: هتسموها إيه يا أم كارم؟ فاتن بصت عليها وهي نايمة وقالت للداية: سميناها مليحة. وهنا اترج بيت سعيد بالزغاريد. خرجت الداية تطمن سعيد على صغيرته، بعد ما سمع الخبر منها استأذن ودخل. لاقاها نايمة يا ولداه في سابع نومة، سمى بالله وحملها بين درعاته، أذن وكبر وقبّل جبينها وبكى لحد ما دموعه نزلت على وشها الصغير فصحيت من النوم. اتفحص ملامحها لاقاها تشبه أمه "ست الحُسن" لحد كبير، فرح بيها وطار من الفرحة وكأنه أول مرة يكون أب! بميلاد مليحة نزلت الفرحة أخيرًا على البيت، الكل فرحان بيها، الكل بيحبها، خصوصًا فاتن وسعيد كانت روحهم فيها. مرت الأيام وبلغت مليحة 6 شهور، وهنا ظهرت ملامحها وملاحتها، كانت بيضاء كيف بياض التلج، حواجبها شقرا وشعرها أصفر، وعيونها بُنيّة عسلية كيف القزاز. كان جسمها مليان وقوامها يكبر سنها بمراحل. كان سعيد طاير من فرحته بيها، رغم ضيق الحال لكنهم ما حسوش، كان اللي يبص لها ينسى تعبه وهمومه. فاتن حبتها وحمدت ربنا على الهدية، إخواتها حبوها حتى أمجد وأسمهان ومدحت، وكأن دي دعوة فاتن إن ربنا يضع لها القبول في الأرض. سعيد حبها واتعلق بيها، كان بيحبها أكتر من عياله كلهم، كإنها وحيدته. كبرت مليحة وبلغت ال4 سنين وسعيد بقى يحبها بزيادة عن باقي عياله، ويدلعها دايمًا، مليحة كانت دلوعة أبوها وكل البيت. كان سعيد وقتها بيشتغل يوميات علشان يكفي حاجة بيته وعياله اللي بيزيدوا، كان كل ما يخلص شغله وهو راجع آخر اليوم يجيب معاه حاجة حلوة لمليحة. وكان يوماتي يشربها عصير جوافة؛ لما داقته أول مرة من كوبايته وهو بيشرب وحبت طعمه. كان رغم ضيق الحال والفقر مدلعها وما بيبخلش عليها بحاجة واصل، القرية كلها كانت عارفة إن مليحة دلوعة سعيد وبيت سعيد. لبسها حلق دهب غالي جدًّا وقتها، حلق شيك جدًّا، وكان بيلبسها فساتين من صغرها، فساتين ما حدش كان يقدر يجيب زيها وقتها. هو اللي حببها في الألوان، كان يجيب لها الفساتين اللي تشرح القلب بلون بينك، وفوشيا، وأحمر، وأخضر وأزرق، وأكتر الألوان أبيض وبينك. كان بيحبها وما بيسبهاش تمشي على الأرض، لو كان يشوفها ماشية يجري يشيلها من على الأرض. كان بيلاعبها كتير ويلعب معاها أكتر، ويفسحها ويخرجها يوماتي حتى لو تعبان. كان عامل لها من دراعه مخدة تنام عليها في أمن وأمان. سعيد كان هو الراجل الوحيد اللي عرفته مليحة في حياتها وفارسها الشجاع، أبوها ضهرها وسندها، كان بيحن عليها دايمًا ولو زعق لها مرة كان يجري يصالحها ويجيب لها حاجات حلوة. كان على قد حبه ليها بيخاف عليها من الهوا الطاير، كان يعتبرها قلبه اللي ماشي على الأرض. من صغرها كان يقولها: هعلّمك لحد ما تبقي دكتورة وأشتريلك عربية وأسوقهالك بنفسي. حلم لها أجمل الأحلام، ووعدها بحاجات كتير.. لكن مش كل حلم شرط يتحقق. مريم توركان 19/5/2026
خبر عاجل: تم توثيق الموضوع:
ثقافة الاعتذار الغائبة.. لماذا أصبح الاعتراف بالخطأ أصعب من ارتكابه؟
تم التوثيق منذ:—

