دا أنا دمي من دمك يا أخويا ليه تقتلني؟ سقتني ليه سمّك؟ ولو جعان.. اوعاك تاكلني! الفصل الخامس عايدة اتفقت مع جوزها إنه لازم يأمر فاتن بالنزول من غرفتها، ومشاركة حريم ولاده في شغل البيت، رغم إنها ما كملتش أسبوع والدة، سمعت الكلام وبدأت تنزل بعد ما بترضع صغيرها وتنيمه، كان هادي جدًّا، يرضع وينام ولا يصحاش غير لما هي تصحيه. في مرة من المرات كانت تحت وقافلة باب غرفتها على صغيرها النايم، خلصت شغل البيت وطلعت لقت أمجد حاطط يده على رقبته، جريت عليه وسألته: ماله يا ولدي؟ رد عليها أمجد: والله في سماه لو كنتِ اتأخرتِ دقيقة واحدة لكنتِ طلعتِ لقتيني خانقه بيدي. فاتن اتفزعت من اللي سمعته وحضنت صغيرها وقعدت تبكي لحد ما جاتها أمها، سألت كتير لكنها ما قالتش عن اللي أمجد كان ناوي يعمله في خيّه. مرت الأيام كيف السنين على فاتن ببيت عبد العزيز، بيت أقرب ما يكون لبيت النار، كان سعد دايمًا يتخانق معاها علشان بتصلي، وبيعايرها بكدا! دا غير حريم البيت اللي مالهمش شغلانة غير الحقد عليها والغيرة منها وحسدها. حسدوها على شعرها فجاتها الحُمّى وبدأ ينزل بطوله، حسدوها على قوامها الملوكي فمرضت ورقدت شهور. مهما كان يحصل ما كانتش بتخالف عهدها مع ربها بخصوص ولاد ندى، كانت بتراعيهم أكتر من وليدها، حاولت كتير تفهمهم إنه أخوهم وتزرع المحبة ما بينهم لكنهم كانوا كيف عيلة أبوهم في الطبع. بدأوا ينفذوا الكلام المسموم اللي عماتهم بخوه في عقولهم الصغيرة، فكانوا يتخانقوا على شيل كارم، وفي الآخر يوقعوه على الأرض ويسيبوه، كانوا عايزين يقتلوه زي ما اتقالهم لكن إرادة الله فوق كل شيء. مرت الأيام مرة ومرة ومرة وكبر كارم وبقى عُمره 4 سنين، كان وحيد مالوش حد رغم إخواته التلاتة، كان أمجد قاسي عليه لأبعد حد، أسمهان كانت بتحن عليه لكن لما عماتها يسلطوها توقعه فيحصل له نزيف جامد في مناخيره. مدحت بقى كان بيغير منه علشان فاكره أخد مكانه عند فاتن، هو بيعتبر فاتن أمه اللي مالهوش غيرها. اتأخرت فاتن في حملها التاني، فكانت عايدة وسلايفها البنات بينشروا كلام في القرية إن فاتن عاقر ما بقتش تخلف، وإنهم هيجوزوا سعيد لما يرجع من السفر. فضلت فاتن تدعي ربها ينصفها وينصرها عليهم، أول ما جوزها رجع من السفر حملت على طول بابنها التاني "ماجد"، وهي حامل فيه كانت بتدعي ربنا يرزقها بابن يكون شبيه بسيدنا عمر بن الخطاب رضي الله عنه، يكون قوي زيه، عادل وحنون وحافظ كتاب الله العزيز. مرت الشهور وجه يوم 5 أكتوبر واتولد ماجد، طفل جميل، نبيل، طيب، شجاع وحنون. كان طويل جدًّا جدًّا، لدرجة كانت تنيمه على حجرها يفيض طوله من هنا وهناك. فرحت بيه فاتن جدًّا وكمان كارم بقى له أخ بجد، لكن القرايب ما وقفوش حقدهم عليها، فكانوا بيطلعوا على ماجد إشاعات إنه مكسح ومشلول، لحد ما الناس بقت تروح تواسيها فتلاقي وليدها زي القمر ما مفيهوش عيب. سعيد كان اشترى حتة أرض بمبلغ بسيط حوشه بعيد عن سعد، وعلى قد فلوسه اشترى قيراط أرض في مكان زراعي مفيهوش غير نخل وتعابين وزواحف وديابة وكلاب. مكان أشبه ما يكون بالمكان المرعب، كانت الناس تخاف تسكن هناك رغم إنه في نفس القرية. سعد لما عرف بالموضوع اتخانق وقوم الدنيا وما قعدهاش، عايز يقاسم سعيد في حتة القيراط دا كمان، لكن سعيد رفض وقاله: عندي عيال يا أخوي ومش هقدر أقاسمك في البيت الضيق دا، وعلشان كدا سعد مضاه على ورثه في البيت الكبير. يدوب سعيد بنى له غرفتين ببيته الجديد، وسعد قام طارده من غير كسرة خبز، رغم إن سعيد كان لسه شاريلهم أراديب قمح وغلّة وماليلهم البيت كله خير وعز. طرده من غير لحاف ولا بطانية، طرده شر طردة، طبعًا الشيخ عز الدين "حماه" وقف معاه وساعده؛ لإنه يا ولداه بقى لا يحتكم على شيء. ورغم إنه بيت بسيط، إلا إنه كان كالجنة لفاتن وسعيد والعيال، كانوا لأول مرة يحسوا بالحرية، يتنفسوا براحتهم، يلعبوا، يجروا، حتى فاتن بقت تلعب رياضة باستمرار. طبعًا كانوا القرايب بيستجوبوا ولاد ندى أول بأول، ويسلطوهم ينكدوا على فاتن وأبوهم، ويقولولهم بطلوا تنادوها يا أمي، دي خدت مكان أمكم، دي عدوتكم، دي ضرة أمكم، دي مش أمكم، دي مرات أبوكم.. دي تنادوها يا عمتي. كانوا بيضربوا الصغار علشان ينفذوا كلامهم، وطبعًا البيت بقى قايد نار. قطعوا الرحم مع فاتن وعيالها، ووصلوا أخوهم وولاد ندى وبس، واستخدموا ولاد ندى في إشعال الفتنة بين فاتن وسعيد، وإنهم ينكدوا عليها عيشتها ولا يسيبوها تتهنى يوم واحد مع جوزها. فاتن كانت أكتر من حلم سعيد، بنوتة جميلة، رقيقة، شاطرة، مهذبة، عابدة، زاهدة في الدنيا، بنت ناس، وأصغر منه بـ 14 سنة بالتمام والكمال. الغريبة إنه يوم ميلادها هو نفسه يوم ميلاد سعيد، يعني عيد ميلادهم واحد رغم فرق الـ 14 سنة. فاتن كانت البنوتة الوحيدة لأبوها وأمها، علشان كدا تاقت نفسها للحمل في بنت، كان ابنها ماجد تم السنة وشهرين وهي حملت. مريم توركان 18/5/2026
خبر عاجل: تم توثيق الموضوع:
ثقافة الاعتذار الغائبة.. لماذا أصبح الاعتراف بالخطأ أصعب من ارتكابه؟
تم التوثيق منذ:—

