الحكواتي (حكاية ابن عبد العزيز) نوڤيلا الإهداء إلى قارئهِ والسلام. مريم توركان حلوة الصلاة ع الزين لو نبتدي بيها دا الهم بيها يزول وينزل لتحتيها قالوا القرايب دوا لو كنت بتعاني وأنا يا زماني غريب والقُربى ظلماني الفصل الأول اجتمع الحكواتي بعد صلاة العشاء مع شباب القرية يحكي لهم حكاية كعادة كُلّ خميس: بعد العدوان الثلاثي على مصر بكام شهر، جه للدنيا سعيد ابن عبد العزيز، طفل جميل، أبيض الوجه، جميل العيون، شعره غزير كيف ديل الحصان، مزيون الوجه بختم الجمال (الغمازات)، سكنت غمازة صريحة منتصف دقنه فزادته حُسن وجمال. سعيد كان أصغر إخواته وأطيبهم وأصفاهم قلبًا، أبوه كان قاسي عليه وبيفضل عليه أخوه الكبير سعد، لكن أمه كانت ست طيبة ومزيونة، تحن على الكل وتزيد من حنانها عليه. كان متعلق بيها جدًّا لحد ما عوده شبّ وبقى في مهد رجولته. كان دايمًا بيشتغل من صغره وكانت همته عالية، عاش مع خالته في قلب القاهرة أكتر ما عاش بقلب الصعيد مع أبوه. كبر سعيد وهو بيشتغل، دخل الجيش، قضى مدة خدمته العسكرية في السلاح الجوي، ورجع اتجوز بنت عمّه. أخوه سعد كان متجوز وعنده أورطة عيال، وكان بيستغل شقا أخوه سعيد ويصرفه على عياله، فضل كدا لحد ما سعيد اتجوز وخلّف. كان بياخد فلوس سعيد يصرفها على بيته هو، ويطرد مرات سعيد اللي بتكون بنت عمه، ولما أخوه يرجع من السفر يرجعها تاني. بيت العيلة كان بيت بسيط خالص، لحد ما سعيد سافر العراق وبنى البيت وفرشه عفش جديد، ودخل ليه الأجهزة الكهربائية، صرف عليه شقاه في العراق. عبد العزيز والد سعيد كان أب ظالم، بيفرق في المعاملة بين عياله، وبياخد شقا الصغير يديه للكبير، ويجبر الصغير بالنفقة على البيت كله وكأنَّهُ خلّفهم ونسيهم! حتّى في معاملته لأحفاده كان بيفرق فيها ما بين ولاد سعد وولاد سعيد، كان دايمًا يضرب أمجد الابن الكبير لسعيد ويقهره بين ولاد عمّه. أمَّا ست الحُسن أُمّ سعيد فكانت نعم الجدّة، حنونة وطبعها أصيل وعِشرتها طيبة. كانت بتحب ابنها سعيد زيادة عن باقي إخواته علشان هو أصغرهم وأطيبهم، كانت بتحزن على ظلم أبوه ليه.. بس لو كانت عاشت كانت هتموت من قهرتها على اللي إخواته عملوه فيه! مريم توركان 14/5/2026
خبر عاجل: تم توثيق الموضوع:
ثقافة الاعتذار الغائبة.. لماذا أصبح الاعتراف بالخطأ أصعب من ارتكابه؟
تم التوثيق منذ:—

