قصة حقيقية حدثت بالفعل منذ عشر دقائق فقط ..
-------
---الوو ...
= أهلا يا فندم ، معاك نسرين من شركة (مش فاكر) للتطوير البتنجاني
-اؤمري يا قمر ( عفوا .. يا نسرين )
= عندنا عروض نحب نعرضها علي حضرتك بخصوص فيلات في الساحل الشمالي في كومبوند ( اسم حلزوني يكتب و لا ينطق )
- لا و الله .. انا مشغول و عندي طبيخ و الخلاط بايظ ،
= طب حضرتك عندك فيلا و لا آي فيلا يا فندم... !
( بصراحة "تنحت" لمدة ثانيتين .. لأن السؤال باغتني .. و مفهمتوش نوعا ما .. لكن من دواعي الفشخرة : )
- طبعا عندي فيلا فظيعة في سفاجا علي البحر مباشرة
= حضرتك هي فيلا و لا آي فيلا يا فندم.. ؟
(هي الولية نسرين مش هتجيبها البر .. 🤔 .. فيلا و لا آي فيلا !! .. هو فيه حاجه اسمها آي فيلا اصلا ؟؟ .. المهم رديت بثقة : )
- الحقيقة هي فيلا كويسه جدا الحمد لله بس السباكة بعافية حبتين
= طب تحب تتعرف علي اسعار الآي فيلات يا فندم ؟
( الاخت دي بتشتغلني ؟ و لا مصممه تحرجني في موضوع الآي فيلا ده .. ممم .. ما هذا المصطلح الجديد الآي فيلا ؟؟!! .... فكرت بسرعة .. آي بالانجليزي يعني أنا .. هل تقصد : أنا فيلا 🤔 ... لا مش ممكن ... ، طيب نفكر بشكل هندسي .. هل تقصد أن الفيلا علي شكل حرف آي مثلا ... معني كده أنها ممكن تقولي بصوتها المسرسع ده .. : طب عندك أم فيلا علي اساس انها علي شكل حرف M .. .. و بعدين فكرت بشكل فني ... قلت ممكن تكون فيلا علي شكل عين .. آي تساوي عين .. و لما دماغي هنجت .. رديت علي مس لزقة : )
- شكرا يا اخت نسرين .. انا مش بحب الآي فيلا لأنها بتخنقني من جوا .. و بتكبس علي نفسي .. و اوعي تكلميني تاني او تعطي رقمي لمعشر المسرسعين اصحابك ..
و اغلقت الخط ...
و يبقي السؤال العظيم .. :
يعني إيه آي فيلا الله يكرمكم ؟ 🤔