=سامحوني لم اكتب البوستات دى =
= "اللى مش حيتفاعل مع الصفحة حعمل له بلوك". بس محدش سأل نفسه هل هو حتفرق معاه انك تعمل له بلوك؟ ما هو اصلا مطنشك ومش متفاعل مع الصفحة لانها لا مؤاخذة تافهه !! يبقى احنا ذنبنا ايه بقى من تهديدات سيادتك ؟!!
= "ارجوكم بلاش رسايل على الانبوكس" طب يا ستى ما تقفلى اصلا ام الرسايل !! او فى حل اسهل نزلى صورتك الحقيقية.
= "الناس اللى كل ما تروح مول او مطعم تتصور وتنزل 300 صورة فى الخروجة " وطبعا الجزء التانى من الصور بعد ساعتين تنزل انها اتحسدت وان ضافرها اتكسر وان الناس مش سايباها.
= "ايه رأيكم فى الحب؟ .. هل هناك صداقة بعد الحب ؟ " ... وام بوستات النحنحة .. والغريب ان اغلب اللى بينزلها ذكور (مش رجالة) وداخلين اصلا الفيس يشقطوا ستات .. يابنى افهم هى الست خلاص يعنى مش لاقيه لدرجة انها مستنية حد من الفيس بيسأل عن الحب !! .. ما بيعدى عليها كل يوم 100 راجل شحم ولحم مش مستنيه سيادتك تتسأل عن الحب فتقول ده واد رومانتيكى !!
= " اذا لم ترسلها ل 10 افراد فسوف يجري لك مش عارف ايه وايه " .... الحاجة الوحيدة اللى بتجري ليا انى بعمل لك انفريد .. مش ناقصة هبل اصلها !!
= "انا حقفل الفيس خلاص وداعا يا اصدقائي" وطبعا بعد 3 دقايق بالضبط "اشكر مساندتكم ليا وعشرات الرسايل اللى خلتنى ارجع ليكم " .. واحنا حننفاجأ طبعا ونخش نشكرها انها رضت تستمر على الفيس ومش حنسأل ازاى جالها عشرات الرسايل والفيس مقفول :-)
بذمتكم كام مرة شوفتوا البوستات دي؟ ديشليون مرة طبعا بس مش حتشفوها ابدا عندى !