وأنا صغيرة ذهبت مع جدي لزيارة بيت أهل زوجة عمي، بلد صغيرة قريبة من طنطا، واثناء تنزهنا في شوارع القرية أنا ومعي طفلة من أقارب جدي هناك مررنا بأرض زراعية غاية في الروعة كانت مزروعة بالورد البلدي، أثار فضولي جمال الورد فنزلت الأرض لأقطف وردة، وإذا به صاحب الأرض يستوقفني
ودار بيننا هذا الحديث
إنت شكلك كدة من البندر مانتش من البلد
_ بخوف طفلة أيوة أنا من اسكندرية
طب وانت يا بنت البندر متعرفيش إن قطف الورد من أرض مش ارضك حرام
_آسفة بس شكل الورد عاجبني
اخد مني الوردة وقالي إنت عارفة إن احنا بنزرع الورد ده عشان عندكم في البندر ياخدوه ويعمله منه الريحة الحلوة اللي بتشتروها في الازايز.
_ عارفة وخلاص مش هعمل كدة تاني وهمشي خلاص راح موقفني وبدل الغضب اللي كان على وجهه ابتسم وقالي طب خدي بقى الوردة اللي قطفتيها هدية مني، شكرته ومشيت وأنا مستمتعة برائحة أجمل وردة شوفتها في حياتي.