" هو انا ازاى أعرف أنا بأطور من نفسى فى مجال العلاقات ده وللا بضيع وقت و مجهود و بحرق ع الفاضى و بعيد فى نفس التجربة لكن مجرد مع أشخاص مختلفة أو قاعدة مع شخص واحد و مبقيناش شايفين مستقبل مع بعض "
صباح الجمال
شوية حجات كده تساعدك تقيمى نفسك و تعرفى انتى بتتحركى وللا مجرد دخلتى فى ال
Comfort zone
- لو انتى بتبصى للمواضيع بحيادية و موضوعية مش من نظارة الضحية و شايفة الأوضاع زى ما هى مش زى ما عايزة تشوفيها
- لو صفاتك الحلوة بتتطور و بتكتسبى صفات جديدة لكنها بردو حلوة
- لو قدراتك اختلفت من أول العلاقة لدلوقتى بمعنى لو انتى بتصبرى ليڤل ١ بقيتى بتصبرى ليفل ٥ ... مثال تانى لو كنتى بتوصلى المعلومة ليفل واحد بقيتى بتوصليها ليڤل ٣ ... مثال كمان لو كنتى بتحتوى الموقف ليفل زيرو بقيتى بتحتويه بسهولة أكتر و بخفة و ليونة أسرع.
- لو انتى سعيدة فى المجمل مش حاسة ان ناقصك حاجة معينة و بتعوضيها بنفسنة مع ناس غيرك
- لو مفيش حاجة ولا حد بيعرف يشغلك عن التطوير فى العلاقة دى ولا هى بتشغلك عن التطوير فى علاقات تانية بردو
- لو بتنجزى حجات تانية جمبها عادى بسهولة مش بتآخد طاقتك كلها
- لو بتعرفى تعبرى عن نفسك فيها مش مكبوتة أو حاسة ان حد هيحكم على مشاعرك و نواياكى فيها.
- لو عارفة تفصلى بين المشاكل و بينك كشخص و بتعتبريها تحديات و بتعرفى تجتازيها و تتجاوزيها ... مش واقفة عندها او بتشل تفكيرك
- لو بتستقبلى النقد على أفعالك و كلامك بالحب و بتآخديه على انه سلمة زيادة تطلعيها مش حاجة تهز ثقتك فى نفسك و توقفك.
- لو فى تناغم فى العلاقة و سلاسة بتدل على انها متماشية مع القيم بتاعتك مش بتخالفها
---------
فى الآخر الموضوع محتاج دافع و شغف و مجهود و محتاج تعملى قرار يومى بانك عايزة تبذلى فى الحتة دى و ان الحتة دى تستحق البذل عشانها
من الوهم انك تعيشى فى دايرة مغلقة و تكونى متخيلة انك بتتطورى
... عيشيها بوعى زيادة أكتر بدل ما تفوقى على صدمة
كمان ١٠ سنين او ٢٠ سنة او زيادة كمان ... لو انتى فشلتى هتلاقى نفسك بتعوضى نقصك ف علاقات ناس داخل دايرة تأثيرك
" زى أولادك"
و زى ما ممكن يتطور عندك مهارات كويسة زى ما ممكن يتطور عندك صفات و مهارات سيئة جداً جداً و تبقى انسانة شريرة و تأذى ناس كتير و ده بيحصل و باسم الحب !
النجاح فى الرحلة و الرحلة مفيهاش وصول "
من وحي كتاب طريقي للراحة النفسية