لكل الناس اللي زعلانة ان السعودية هي اللي كرمت هاني وان مصر اولى بيه.. وان اصل هما كانوا عايزين ياخدوا اللقطة وخلاص.. ارجوا ان صدوركم تتسع للكلمتين اللي محتاجة أقولهم..
أولا هاني شنودة لو لقى تكريم من مصر مكانش هيروح السعودية.. خلوني اقول لحضراتك ان الكنيسة رفضت تكريم الموسيقار الكبير المصري اللي جزء أصيل من مصريتنا من هويتنا المصرية من تراثنا من تاريخنا.. عارفين ليه؟!
أقولكم ليه.. عشان اعمال هاني شنودة لا تليق بمسرح الكنيسة.. هسيب لحضراتك الرد طبعا في الموضوع ده..
من ييجي شهر وشويه كده جالي تليفون.. ان في معرض كتاب بيتعمل في محافظة قنا.. ركزوا معايا كده اللي هو محافظة في اقصى صعيد مصر.. واختاروا شخصية المعرض السنة دي عبد الرحيم منصور تكريماً له ولأعماله فرحت قوي وطيرت من الفرحة وقولت اخيراً افتكروه يا فرج الله.. قالولي بس عايزين فيلم عنه.. قولت ياسلام من عيني.. ١٥ يوم بره بيتي مش بدخل غير ع النوم وتعب اعصاب وتوتر وعايزة اخلص بسرعة وعايزة اعمل احسن حاجة وادفع فلوس هنا وهنا وهنا..
مع ان الفيلم مكانش دوري خالص.. هو دور وزارة الثقافة ومن زمان واقل واجب انها تعمل فيلم عن عبد الرحيم منصور وتكلفه تكلفة محترمة مش انا ادفع من جيبي..
المهم انه في الآخر قبل المعرض بأيام قالولي معلش المعرض هيتأجل لأجل غير مسمى "عايزين يقولوا هيتلغي بس بشياكة"..
المهم قولتلهم طيب بس ليه احب اعرف السبب.. قالولي وزارة الثقافة واخدة قرار بترشيد الاستهلاك..
طبعا انا ضحكت بس لأنه لو مضحكتش كنت هتجلط على طول.. يعني انتو لما ربنا كرم واقتكرتوا تكرموا عبد الرحيم منصور في معرض في الأقاليم افتكرتوا انه هيكلفكم..
الخلاصة شكرا للسعودية وشكرا لتركي آل الشيخ وشكراً لخادم الحرمين ووزارة الترفيه..
وشكراً لأي شخص يقدر قيمة اللي قدامه ويحترمه ويحترم فنه وتاريخه..
أما عن مصر والمصريين " نحن ورثة سفهاء لتاريخ عظيم"..