في 20 نوفمبر 1989، اعتمدت الجمعية العامة للأمم المتحدة اتفاقية حقوق الطفل، ومنذ ذلك التاريخ أصبح يوم 20 نوفمبر مناسبة عالمية للاحتفال بالطفل والتذكير بحقوقه. لكن الحقيقة إن حقوق الطفل مش مجرد مواد قانونية مكتوبة على الورق، دي ممارسة يومية بتبدأ من البيت، ومن الطريقة اللي بنتعامل بيها مع أطفالنا. فالبيت هو أول مدرسة للطفل، وفيه بيتعلم معنى الاحترام والكرامة والأمان، وبيعرف إذا كان صوته مسموع وله قيمة ولا لأ. الاحترام طريق ذو اتجاهين بنطلب من أطفالنا يتكلموا بأدب ويحترموا الكبار، وده حقنا في تربيتهم، لكن في المقابل من حقهم كمان إننا نتعامل معاهم باحترام. نبرة الصوت، وطريقة الطلب، واختيار الكلمات، كلها رسائل بتوصل للطفل أسرع من أي نصيحة. لما نقول له «لو سمحت» و«شكرًا»، إحنا بنعلّمه الأدب بالممارسة مش بالمحاضرات. أما لو طلبنا منه يتكلم بهدوء وإحنا بنصرخ، فهو هيتعلم الصراخ مش الاحترام. كرامة الطفل مش قابلة للتفاوض من أبسط حقوق الطفل إنه مايتعرضش للإهانة أو التوبيخ قدام الضيوف أو إخوته أو زملائه. فالتوبيخ العلني مش بيصلّح السلوك، لكنه ممكن يجرح كرامة الطفل ويخلّيه يخاف من الاعتراف بأخطائه. لو طفلك غلط، اختاري وقت هادي واتكلمي معاه على انفراد، ووجّهي السلوك بدل ما تهاجمي شخصيته. فيه فرق كبير بين إنك تقولي «التصرف ده غلط» وبين «إنت طفل وحش». من حقه يسمع كلمة آسف فيه اعتقاد عند بعض الأهالي إن الاعتذار للطفل ممكن يقلل من هيبة الأب أو الأم، لكن الحقيقة إن الاعتذار مش ضعف، ده قمة النضج التربوي. لما تقولي لطفلك: «أنا آسفة إني اتعصبت عليك، وماكانش المفروض أتكلم بالطريقة دي»، إنتِ بتعلميه إن الاعتراف بالغلط شجاعة، وإن الإنسان مهما كان كبيرًا ممكن يغلط ويصلّح غلطه. الطفل اللي بيشوف الاعتذار قدامه، بيتعلم يعتذر بصدق لما يغلط. من حقه يكون صوته مسموع مش معنى إن الطفل صغير إن رأيه مالوش قيمة. من حقه يعبّر عن رأيه في الأمور اللي تخصه، زي اختيار ملابسه أو لعبته أو النشاط اللي بيحبه، مع مراعاة سنه وحدود الأمان والمسؤولية. حتى لو القرار النهائي في إيد الأهل، مجرد إننا نسمعه ونشرح له أسباب اختيارنا، بيعلمه الحوار واحترام الاختلاف، وبيخليه يحس إن له مكانة وصوت داخل أسرته. الأمان النفسي حق مش رفاهية الطفل محتاج يعرف إن حب أهله ليه مش مرتبط بدرجاته أو نجاحه أو قدرته على إرضائهم. المقارنة المستمرة بالإخوات أو أولاد الأقارب، والسخرية من شكله أو قدراته، والتهديد بالحرمان من الحب، كلها ممارسات ممكن تهز ثقته بنفسه وإحساسه بالأمان. الطفل الآمن نفسيًا هو الطفل اللي يقدر يجرّب ويغلط ويتعلم، وهو عارف إن أسرته هتفضل مصدر دعم واحتواء ليه. في النهاية.. الإتيكيت يبدأ من طريقة تعاملنا مع أطفالنا الإتيكيت الحقيقي مش إننا نعلّم الطفل إزاي يقول «من فضلك» و«شكرًا» وبس، لكنه إننا نكون أول ناس نطبّق الكلمات دي في تعاملنا معاه. فالطفل مش بيتربى على اللي بنقوله بس، لكنه بيتشكل من اللي بيشوفه وبيعيشه كل يوم. وفي اليوم العالمي للطفل، خلّينا نفتكر إن أجمل هدية ممكن نقدمها لأولادنا مش لعبة غالية ولا خروجة مميزة، لكنها بيت يحترمهم، ويسمعهم، ويحافظ على كرامتهم، ويمنحهم الأمان والحب غير المشروط. لأن الطفل اللي بيتربى على الاحترام.. بيكبر وهو عارف يحترم نفسه والآخرين.
