حكاية بمناسبة عيد الأم

المهم في يوم وانا نازله لقيتها ادام باب العماره في الشارع وعربيه خبطتها....وللاسف لقيت الجزء التحتاني كله مابيتحركش..

وطبعا اي حد بيشوفها.. بيبص عليها ويمشي

انا شوفتها وفضلت واقفه جنبها...مش عارفه اعمل ايه...عندي قط في البيت عنده مشكله صحيه ما اقدرش ادخل قطه من الشارع عليه ومناعته ضعيفه..

وما اقدرش اسيبها في نفس الوقت...

ربنا الهمنى اني اخدها واحطها في كرتونه في العماره واحاول اعالجها...

للاسف شوفت انها بترضع وديه مشكلة تانيه....ليها اولاد رضع وماكونتش اعرف مكانهم...ولو في الاوضه المهجوره مستحيل اعرف اجيبهم...الشباك عالي ومايدخلش بني ادم اصلا

كنت قلقانه من حالتها..

هل ده شلل ولا كسر...ولا ايه بالظبط..

المهم بالخبره عرفت انه مش كسر...ولا شلل لان كان عندها مقاومه بسيطه...بس كل مابحاول اوقغها تقع على جنبها ...زي اللي مش متحكمه في نفسها...وانا مش عارفه هاعرف ازاي اتابعها برغم مسؤلياتي ؟...بس قولت ربنا المعين

بالخبره برده...اديتها مضاد التهاب وكالسيوم بتاع اطفال وقولت اجرب...ولو ماجبش نتيجه هوديها لدكتور

بس فضلت مشكلة...ولادها فين؟

دورت عليهم في كل مكان حتى بصيت على الاوضه مالقتش اثر ولا صوت...قولت يمكن مش موجودين او اصلا ماتو...بس جوايا بيقول انها بترضع وواضح انهم كانوا بيرضعوا لاخر وقت لغاية ما شوفتها

طبعا اتنكدت جدا...بس قولت المهم اعالجها...فضلت ٥ ايام احاول اعملها علاج طبيعي واخليها تقف واسندها...بس كانت بتقع على جنبها كل مره....فضلت معاها لغاية اليوم التالت مع الادويه اتحسنت بسيط...حسيت ببارقة امل...لغاية ما الحمد لله ابتدت تقف لوحدها في اليوم الخامس وابتدت تمشي لوحدها...

وفجاه مالقتهاش...واذ فجأه سمعت صوت الصغيرين من منور بيطل عليه الاوضه المهجوره..

طبعا قلت لازم ادور عليها .. لاني توقعت الاطفال دول اولادها...

لغاية ما طلعت فوق السطوح ادور عليها...لقيتها فعلا بس قاعده تحت الشباك مش عارفه تطلع لولادها علشان كده البيبهات حسو بيها .....طبعا ماصدقتش ...ايه السيناريو اللي يتعمل فيلم ده...طلعتها وخليتها تدخل لاولادها من الشباك...وربنا وراني مشهد خلاني ادمع منه....الاطفال بتجري على امهم بهيستريا وهي بتعمل مواء كانه بكاء...وبتنضف فيهم بنهم

مابقتش عارفه ربنا جبر بخاطرهم..ولا خاطري انا ...علشان يوريني منظر زي ده وكمان يطمني عليها بعد ما فعلا تعبت نفسيا من حالتها...وقلقي عليها

المهم بقيت ادخلها اكل هي واولادها من الشباك...لغاية ما الحمد لله تعافت وبقت تخرج لوحدها

بعد ٥ ايام الام توصل لاولادها...والغريبه ان اولادها يعيشوا كل ده من غير امهم وهم لسه بيبهات ماكملوش ٤٥ يوم

وفي الاخر الناس بتستغرب ليه محبي الحيوانات بيدافعوا عنهم وخايفين عليهم ؛)

علشان ببساطه ربنا بيوري اياته ومعجزاته فيهم...

وديه هبه من ربنا والله للي بيراعوا الحيوانات في اي مكان...

وفيه ناس كتير هيوافقوني انا عارفه لانهم مروا اكيد بحاجات مشابهه

الحمد لله ان ربنا جمع الام بولادها...والحمد لله ان الام استردت صحتها..

والحمد لله انه جبر بخاطري