امتى و ليه بطلت أحط ميكب و أى مستحضرات للتجميل ؟
-------
بدأت ديتوكس للميكب من سنة ٢٠١٨ لما قررت انى هأنزل أشتغل تانى
كنت قبلها ربة منزل لمدة ٤ سنين متواصل ما بين الحمل و الولاده و لخبطة الهرمونات و سهر الليالى مع الأطفال و التغيرات الفسيولوجية للسن بتاعى ...
كان حوالين عينى هالات سوداء و بدأ يظهر فى وشى حب الشباب و أسنانى اتأثرت جداً و شعرى وقع كتير ...
فكنت دايماً بأستخدم المستحضرات و بأعمل كل حاجة عشان اهتم بنفسى بشراهة يعنى ... مكنتش سايبة حاجة الا و بعملها
بس مع الوقت كونسبت الاهتمام بنفسى اتغير شوية ... يعنى بدل ما كان بيتمثل فى ازاى أخفى معالم الارهاق و التعب و المشاكل دى ...
بقى عبارة عن انى أعتنى بيها و أهديها و أراعيها لحد ما تختفى بالفعل مش انا اللى أخبيها بميكب ...
و ده اللى حصل فعلاً
الأول بدأت بنومى ... و بقيت بنام من أول الليل و بأصحى بدرى ... فالهالات السودا خفت
و بدأت أتبع أسلوب أكل صحى عشان ميلخبطش الهرمونات عندى فيطلعلى حبوب زيادة .... و فعلاً قلت الحبوب و لما بلخبط فى الأمل بتزيد
بطلت ميكب فبقى وشى بيتنفس
قللت غسيل لشعرى فبقى بيفرز الزيوت بتاعته و بيتحسن
أكلت خضار و فاكهة فبقى وشى لونه حلو مش باهت
و غيره من أساليب الاعتناء بنفسك
------------
نرجع بقى للسؤال ... ليه عملت كده ؟
مع انى مكنتش بأحط ميكب كامل او الحاجة اللى تبيننى بلاستيك ولا كنت بأحط حاجة على بشرتى يا دوب كان حوالين عينى و روج ...
بس كنت بدأت أحس انى من غيره منفعش !
من غيره غريبة !
من غيره مش كفاية لأ !
و الحاجة اللى تتمكن منك كده ... بتحد من حريتك حقيقى
فقررت انى هأعمل ده فى وسط اول مجتمع غريب أقابله ! هما ميعرفونيش قبل كده فمش هأستقبل تعليقات من نوعية مالك ! شكلك مرهق ؟انتى تعبانة ؟ الخ الخ الخ
و قولت هأشوف مدى تقبلهم لشكلى ... و كانت النتيجة ان محدش علق خالص ع الموضوع ! و محدش شافنى غير نفسى بموودى العادى خالص و بحالتى الصحية زى ما هى !
ديتوكس الأصنام اللى احنا عايشين جواها ...
النهاردة بميكب ... بكره من غيره عادى !!
Note :
بستخدم فلتر فى الصور عادى و ده عشان أتفادى ال
Editing
سواء فى الوش أو فى الاضاءة و الالوان.
فى المجمل الانسان فى الحقيقة أحلى من الصور مليون مرة و الانسان بطبيعته أحلى من أى اضافات