كوكب بلوتو يبدأ تراجعه السنوي

والحقيقة ده مش حاجة عجيبة ولا غريبة #بلوتو بيقضي نص حركته كل سنة متراجع بس تراجعه ده بقي ايه تاثيره علينا

عايزة احكيلكم اول ع كوكب بلوتو..كوكب بلوتو هو من ابعد الكواكب عن  المجموعة الشمسية بيدخل #البرج يقعد من 14 ل30 سنة في كل برج اه والنيعمة بس مش لانه كوكب بطئ كده يبقي مش بياثر علينا او مش مهم زي القمر اللي مزاولنا كل يومين ونص ده بالعكس بلوتو ده واحد من اكتر الكواكب الي بتاثر علينا وبنسميه كوكب اجيال لان طبيعي انه بيتولد وهو في نفس مكانه كده جيل بحاله ابقوا فكروني احكيلكم حكايته مع جيل التمنينات وليه كله جيل نحس كده

المهم انا من اول مابدات احاول افهم فلك وانا في كوكبين ببص عليهم اول ماشوف  اي خريطة فلكية اولهم بلوتو ..ليه بقي..لان  مكان بلوتو في خريطتك هو المكان اللي هيقتلك علشان تعيش ..بلوتو بنسميه كوكب الهدم والبناء بس مش زي المريخ مثلا طايش وهايج ولا #زحل الراسي العاقل اللي بيربيك بالبطئ لاء بلوتو يسيبك تبني تبني لحد ماتخلص اخر دور في العمارة فيهبدك ع الارض مرة واحدة لان اساسات العمارة كانت ضعيفة..بيهد المزيف علشان يبني الحقيقي

مثال لو #بلوتو عندك في البيت 11 مثلا ده بيت طموحك واصحابك وحياتك الاجتماعية..اعرف ان ده مكان درس عمرك...هيخليك اجتماعي محبوب فلة شمعة منورة وحواليك امم وبتلمع في اي مكان لحد ماتحس ان شعبيتك ولا محمد رمضان في زمانه...وهوب فجأة تاخد خازوق متين يطلع من نافوخك حرفيا من اكتر صديق متتوقعش منه ده ...هوب تبص ع الزحمة اللي حواليك تلاقيها بتنفض فجاة تصرخ هو في ايه انا كويس انا زي مانا متلاقيش حد..تروح تيجي تتشال تتهبد بقيت لوحدك وانت مش فاهم في ايه وبعد ماتقعد تلطش كده فترة محترمة ممكن توصل لسنين تبتدي تكتشف ان العزلة لك احسن وان الزحمة مفدتكش بحاجة بالعكس دي توهتك عن اهدافك واحلامك فتنتبه لاحلام تكتشف مواهب جديدة فتتحول لنسخة جديدة بupgrade  جديد بطموح مختلف ..قيس ع ده بقي وجوده في اي بيت عندك هتلاقي درسك بيتكرر في جانب معين من حياتك لحد ماتفهم الدرس وجتتك تنحس

ده بلوتو كوكب الدمار والبناء وهو حاليا في برج الجدي بئاله 14 سنة وهيخرج منه بعون الله السنة الجاي لبرج الدلو ولان برج الجدي بيمثل الحكومات فاغلب الفلكيين شايفيين انه مش هيخرج من الجدي الا وهو هادم  او مغير في النظام العالمي علشان يبني واحد جديد ..

بلوتو من اهم الكواكب اللي بنفهم منها مسار حياة اي بني ادم من خلال خريطته الفلكية وبنفهم المكان اللي هيكون اصعب اختباراته فيه ..الكواكب مبتاثرش ع حد هي بس لها لغة بتحكي قصة حياة كل واحد فينا مش اكتر يمكن بسبب بعد المسافة مابينا وبينهم  او يمكن زي ماقال هرمس ان كما في الاعلي كذلك في الاسفل ..كل مايحدث في الارض له انعكاس في السما 

#نشرة_اخبار_الكواكب