الاسم باب شقة
و هو باب افراح
هو بسيط حقة
لكنه خلفه براح
تديه يدوب زقة
تدخل و تنسى جراح
خبط عليه بيدك
مش محتاجين اجراس
دة عمره يوم ما اتسك
لا بقفل و لا ترباس
و منين هيجي الشك ؟
و كل الجيران حراس
شراعته ما تتقفل
مفتوحة ع السلم
و ناس اهي واقفة
تضحك و تتكلم
طالع و نازل مين
لابد ما يسلم
و تشم ريحة الخير
بامية و ملوخية
دي الست ام سهير
عليها تقلية ????????
تطبخ و تدي الغير
أم الكرم هي
و الريحة دي قهوة
فوق السبرتاية
و الطعم له زهوة
تحويجة ايه ???? حكاية
من صنع ايد الحج
و الحج دة أية
و الله زمان طيبة
و لى و سابنا و فات
ايامنا دي غريبة
كئيبة صوتها سكات
و اتقفلت الابواب
و قلوبنا وياها
و اتفرقوا الاحباب
احياء كما الاموات