الأنثى هى أجمل و أبرع ما خلق الله بكل ما تحمله الكلمة من معنى و صفات .
فيها ميكس مشاعر أحياناً مفهومة و واضحة و أحياناً تانى غامضة و كلها أسرار و لوغاريتمات .
ف هى أنثى ب « عطفها و ضعفها » ، « هدوئها و غضبها » ، « حنيتها و قسوتها » .
ف الأنوثة صفه فطريه جوا كل إمرأة ملهاش أى علاقة ب شكل ولا عمر معين .
ولا كمان ملامح بتتميز بيها أنثى عن غيرها .
دى كمان مش حكر على الشابات الصغيرين أو الجميلات و الأنيقات .. و لكن !!
لكل أنثى صفات بتتميز بيها عن غيرها ، ف الأنوثة فن سهل جداً تتقنه كل إمراة ...
أنوثة ف صوتها ، و مشيتها و طريقة لبسها ، و لغة جسدها و كلامها ، و طريقة أكلها ...
ضيفى على كل دة بقى أن الأنوثة أخلاق و أدب و رُقى ف التعامل مع الآخرين .
و يكلل كل الصفات الرائعة دى إنك تتزينى بتاج " الحياء و الخجل " فهما أعظم من يميز الأنثى عن غيرها من المخلوقات .
و للأنثى شخصيات مختلفة ف التفكير و التعامل مع جمالها الشخصى أو العقلى فمنها :-
١- الأنثى العقلانية :- و دى أنثى ميولها أكتر للعقل ف أغلب تصرفاتها و حتى ف حكمها على الأمور و للأسف دى شويه مش بيفضلها الراجل لأنها دايما تساوى نفسها بيه و بتهمل فى نفسها ... و هنا لما بتكلم عن المساواة المقصودة ف بتكلم عن الأنثى اللى بتحمل بعض الصفات الذكويه زى
~ أنها تكون ند للراجل فى كل شئ
~ عنيدة و عصبيه و لا تقبل النصح ولا الإرشاد .
~ خلعت توب الحياء و الخجل ف الكلام مع الرجل ف كل الأمور الشخصية .
~ المتسلطة و المتحكمة ف كل أمور الحياة .
٢- النوع الثاني هى الأنثى العاطفية ( Drama Queen ) هى أنثى شديدة العاطفة و دائماً شايفة نفسها ضحيه للحياه ف العموم ... حياتها بتتمحور على وجود الرجل ف حياتها .. ثقتها ف نفسها شبه منعدمة ...بتهتم بجمالها الجسدي و تهمل ف عقلها و طموحها و أهدافها ، و دى كمان لا يميل ليها الرجل بطبعة ، لأنها دايما تابع ليه و لاغيه شخصيتها نهائى ، حاجة كدة شبه « أمينه فى فيلم بين القصرين »
٣- النوع التالت و هى الأنثى المتزنه ... شخصيتها مرنه و عارفة توازن ما بين الجمال و العقل و الحكمة و الحب . روحها مرحة و تفكيرها إيجابى .
مثقفة زى ما قال سقراط عنها " عندما تثقف رجلاً ، تكون قد ثقفت فرداً واحداً ، و عندما تثقف إمرأة فإنما تثقف عائله بأكملها "
هى أنثى ذكيه بتعرف أمتى تكون ضعيفة ف وجود الرجل و أمتى تكون قويه ف غيابه .
و لأن طبيعة الراجل القاسيه فهو بيحب إنه يشوف أنثاه زى وردة ف رقتها .. و زى الحرير ف نعومته .. و زى الطفله ف برأتها
هنا بقى هو بيقدرها و يقدر الحياه معاها .
ف الرجل يا عزيزتى يريد أنثاه أن تستمد قوتها منه و لكن مع الاخرين هى المرأة الحديدة .
الرجل بيحب يكون الملك فى بيته مع الأنثى اللى اختارها بكامل طاقتها الأنثوية .
تعالى كدة أقولك على كام همسه ف أذنك و حاولى تسمعيها و تنفذيها ...
١- كونى رومانسيه ف بيتك و مع جوزك ، استمتعى بكامل طاقتك الأنثوية ف حضوره .
٢- أبعدى عن النكد و الإنتقاد على كل تصرف يعمله الرجل ، سيبيه يغلط مش مصيبه يعنى .
٣- اتقنى فن التغافل عن بعض أخطاءه .
٤- دموعك سلاح فتاك ف بلاش كل شويه دموع على اتفه الأسباب ، لان الراجل لما بيحب بجد مش بيستحمل دموع حبيبته ، ف مش عمال على بطال تعيطى و تنكدى عليه .
٥- لسانك هو سلاحك ف دايما خلى كلامك حلو و مهذب و أبعدى عن النقد و ملامه كل تصرف للرجل .
٦- بلاش تقومى بكل أدوار الرجل ف البيت و يفضل إنك متصرفيش ع البيت لان الرجل الحقيقى بيحب هو اللى يصرف على أنثاه .
٧- بلاش تكونى مسيطرة على كل كبيرة وصغيرة ف البيت ، لان الراجل بيحب يكون هو قائد المركب مش يكون هو التابع .
٨- بلاش تشيلى انتى الحاجات التقيله ، اطلبى منه هو يشيل عنك لأن دة بيغذى ثقته بنفسه و بقوته العضليه ، و بيكسبك انتى هاله من الأنوثة الطاغيه .
شويه نصايح ليكى انتى بقى يا ملكة الكون
~ اهتمى بجمالك الجسدى و أناقتك الشخصية .
~ حبى نفسك و افهميها كويس و بلاش تظلميها .
~ دلعى نفسك شويه .. الدلع مش حرام .
~ أحترمى نفسك و قدريها .
~ أوعى تقارنى نفسك بأى أنثى غيرك .. و أتأكدى أن لكل أنثى ميزة ميزها بيها ربنا يوم ما خلقها ف رحم أمها .
~ مارسى هوايتك .. مارسى هوايتك .. مارسى هوايتك .
و أخيراً ...
لازم تتأكدى إنك نعمة ف حياة كل شخص أتعامل معاكى .