ابوك شقيان
مهوش ماسك
ولا بخلان
ابوك اتحمل النوة
عشان انت تنام دفيان
ابوك ياما كلها بالدقة
عشان انت تبات شبعان
ابوك ياما رقع الهدمة
عشان تلبس جديد ف العيد
ابوك ياما دارى كام صدمة
و كان بيبين أنه سعيد
علشان ما تشيلش يوم الهم
شموع فرحك بيده يقيد
ابوك اتحمل الاهوال
و مهدلك بايده طريق
و شال على كتفه حمل جبال
و كان يحلم تكونله رفيق
فكون راجل ف ضيق الحال
ما تتخلاش ف وقت الضيق
ولما الدنيا تتبدل
و لما حاله يتغير
و لما تشوفه متبرجل
و لما تشوفه متحير
قول يابا عنك الشيلة
ما ياما شيلتني صغير