أعمل للعالم ميوت
وشد فيشة الكهرباء
وإقلبها ضلمة ع المتعبين
وإرتاح بعييييد
عن السمك المفترس
ولحد ماتبعد إحترس
من كل من حولك هنا
السمك عيونه ميتة
لكنها بتحسد عيونك
اللي ماليها الحياة
شوكه وقشره جارح
لو حضنته
أو مشيت في طريق معاه
وذاكرته مش حتسعفه
عشان يحاسب عليك
أو يقول آمين وراك
على كل حاجة تحبها
سيب السمك للإفتراس
وإملا شنطك إحساس
وروح هناك في أبعد مكان
مايكونش فيه ولا إنسان
غير الشوية اللي لسه فيك
بعد جرح المعمعة.
اعمل ميوت وأوعاك تموت
خد بس هدنة رفيعة
وقول على الدنيا السلام
وهو ده أحسن كلام
رانيا ثروت