ولما قابلني بصيت له
متبسمة ..
والدموع متقسمة
على المقامات صبا ونهاوند
قالي سلام قلت له.. لا
ولا كلمة
ولانسمة
تعدي مابينا
وده على روحي
مليون عهد
أذتني كتير بآلاعيبك...
بأكاذيبك
بطبع خيانة ساكن فيك
آخر شيء كان ممكن
في يوم عنك يتصدق
سلامك ده على الأموات
على أرواح في يوم حبت
بصدق براءة الأطفال
واندبت على بوزها
في وحل الوهم
وكسر العهد
شوف حتى وأتحقق
سلامك ده سلام مسموم
وحيجي يوم
يدوق قلبك من الدنيا
تمام الرد
صحيح أنا عمري ما أتمنى
للخير اللي ساكن فيك
وجع أو حزن
عشان شايلة
في عمري وتاريخي
حاجات تانية
أيام تانية
كنت فيها للعمر رفيق
للقلب صديق
ولنور الشمس لو تطلع
في وسط غيمي المر طريق
وقلب عزيز هديتهولي
وعشمت القلب باللولي
وصحيت على صراخ وعياط
ولما سألت قالولي
بكل قسوة قلبك مات
ماعدش ينفع مابينا سلام
أو كلمة
أو نظرة
أو حتى مرور عابر
مافيش في العمر
وقت خلاص
يضيع تاني
في ميت قهرة
في ميت توهة
وصولها حرام
حذار وأوعي تتكلم
ولو في الحلم
وتقولي سلام
رانيا ثروت