بعض من رباعيات صلاح جاهين

تسلم يا غصن الخوخ يا عود الحطــب / بييجي الربيع .. تطلـــع زهورك عجب / و انا ليه بيمضـــي ربيع وييجي ربيع / و لسه برضك قلـــبي حتة خشب.


-----------------------------------------------------------------------------
الدنيا من غير الربيع مـــيته / ورقة شجر ضعفــانه و مـــفـــتــته / - لا يا جدع غلطان تأمل وشوف / زهر الشتا طالع فــــــــي عز الشـــــتا

----------------------------------------------------------------------------
ياللي انت بيتك قش مفروش بريش / تقوي عليه الريح .. يصبح ما فيش / عجبي عليك حواليك مخالب كـــــبار / و ما لكش غير منقار و قادر تعيش

---------------------------------------------------------------------------
أنا كنت شئ و صبحت شئ ثم شــئ / شوف ربنا .. قادرعلي كل شـــئ / هز الشجر شواشيه ووشوشني قال / : لابد ما يموت شئ عشان يحيا شئ

--------------------------------------------------------------------------
كروان جريح مضروب شعاع م القمر / سقط من السموات فؤاده انكســـــر / جريت عليه قطه علشان تبلعــــه / أتاريه خيال شعراء و مالهـــــوش أثر

--------------------------------------------------------------------------
نظرت فوق للنجوم و انا ساير / رجليا عترت في الحفر و الحجاير / بقيت أقول و انا ع التراب: يا سلام / مش بس عبره أخذت لكن عباير

--------------------------------------------------------------------------
أنا شاب لكن عمري ألف عام / وحيد لكن بين ضلوعي زحام / خايف و لكن خوفي مني أنا / أخرس و لكن قلبي مليان كلام

-------------------------------------------------------------------------
و الكون ده كيف موجود من غير حدود / و فيه عقارب ليه و تعابين ودود / عالم مجرب فات و قال سلامات / ده ياما فيه سؤالات من غير ردود

------------------------------------------------------------------------
خرج ابن آدم من العدم قلت : ياه / رجع ابن آدم للعدم قلت : ياه / تراب بيحيا ... وحي بيصير تراب / الأصل هو الموت و الا الحياه ؟ !!!

-----------------------------------------------------------------------
ياما صادفت صحاب و ما صاحبتهمش / و كاسات خمور و شراب و ما شربتهمش / أندم علي الفرص اللي انا سبتهم / و الا علي الفرص اللي ما سبتهمش

-----------------------------------------------------------------------
عجبتني كلمة من كلام الورق / النور شرق من بين حروفها و برق / حبيت أشيلها ف قلبي .. قالت حرام / ده أنا كل قلب دخلت فيه اتحرق

----------------------------------------------------------------------
في يوم صحيت شاعر براحة و صفا / الهم زال والحزن راح و اختفي / خدني العجب و سألت روحي سؤال / أنا مت ؟ و لا وصلت للفلسفة

---------------------------------------------------------------------
إيش تطلبي يا نفس فوق كل ده / حظك بيضحك و انتي متنكده / ردت قالت لي النفس : قول للبشر / ما يبصوليش بعيون حزينة كده