نصائح لمالكي رينو فلوينس

متجيش اول متقولك براحة على المكنة انت ماشي بيا ٣٠٠ الف كيلو، ترد تقول هشوف عربية غيريك، بعد ما هلكت البساتم.

خلي عندك دم الحياه مش كلها بنزين ٩٢، يا أخى لو مرة فى الشهر اديها بنزين ٩٥ واعتبرها خروجة. عشان تنكها يفضل نضيف، الحياه مش كلها صيام، ومتنساش فلتر البنزين عشان ده القولون العصبي ومتخلهوش يطلع عليك.

اه مهمة اوى... الفتيس مش بالعافية وتبقى عاوز الاولانى فى التانى فى التالت فى الرابع فى الخامس، لا ياحبيبي انت مش مأجرها وخلى كل غيار براحته ومتقرصش، وافتكر ان انت واخدها cvt ومتفقين على كده، كفاية انها مبتحسسكش بالغيار ومش واقفة معاك على الخامس لو عاوز لحد ١٠٠ هى معاه بس متكبسش جامد سبها براحتها عشان تاخد راحتك، ومتتعاملش مع الفتيس انه عصاية بس ، لااااااااا تسمحلى ( الفتيس لازم تغيرلة زيت وفلتر ) وتروق عليه، الحياه مش كلها N.D.R.P

لما تقولك براحة على العفشة، متفتريش عليا عشان تكمل معاك المشوار، وافتكر ان الحياه بالهداوة والتفاهم والحنية، وافتكر ان الحياه فيها مطبات واسفلت ناعم، عشان الكلام ده مع الوقت هيعمل شرخ مابينكم فى علبة الدركسيون، هتيجى تقولها يمين شمال هتقولك معرفكش. وساعتها هنبتدى ندخل ناس عفشجية ما بنكم ولا هيحلو ولا هيربطو لانه شايف الموضوع من بره، كل همه المساعدين والمقصات، وعمره ما هيبص للكاوتش هيقولك اى بتاع زويا يربيهم.

افتكر ان فى ما بينكم ٤ فرد كوتش فى رقبتك، لازم يكملو دراسة الطرق والمطبات، ومتحرمهمش من التيل والطنابير

وخليك حنين عليهم عشان ميجلهمش بلالين وتجري بيهم فى نقر ومطبات،وبعد كده تجرى على بتوع الكاوتش، افتكر ان ال ٤ فرد دول شايلين اسمك ورخصتك.

متلعبش فى كهربتها وترجع تزعل،عشان الموضوع ده بيضايقها هى مطلبتش منك غير البطارية، عشان الكنترول ميهيسش والدنمو يبوظ وتبطل تشحن، متلعبش فى اعصابها ومتبقاش نكدى وبتاع مشاكل. وهتتغلط فى الاخر.

بالنسبة للدورة بتاعت التبريد، افتكر ان المياه حمرا،عشان الريداتير ميصديش، متقربش منها وتستنصح وتقول افتح القربة وهى سخنه عشان اطمن عليها سبها لما تبرد مش اقل من ٤ الى ٦ سعات على حسب، عشان لو سخنه هترطش عليك وهتبهدلك وممكن تطحن منك والزيت يخش على المياه

 

انت مختهاش من الوكيل عشان تبهدلها، ولا هو فى اول ١٠٠٠٠ كيلو تعمل زيارة للوكيل ومتخلهاش تزور وكيلها تانى وتقطع صلة الارحام ويكون فى جفا على الاقل فى المناسبات. ولاخايف من سعر الكود الاصلى فى قطعة الغيار. ماهو لازم يكون فى لبس العيد على الاقل وتكون حاجه براند، انت مختهاش اتومبيل وترميها صاج.

انا مش هتكلم فى حاجه تانى.

وهسيب باقى الخصوصيات مابينكم ومش هدخل جو الصالون طول ما باب السواق مقفول عليكم والاصول ان محدش يفتح الشنطه حتى لو الصنايعى قالك هشيل لك قطعة الغيار القديمة.

 

اظن بعد الكلام ده كله تنزل تبوس العلامة ديه عربيتك محدش هيقولك انت بتعمل ايه، ومتقولش بقرف عشان مش نظيفة، اغسل العلامه محدش قالك تسبها كده.

واسمع كلمة بحبيك يا فلوانس