الماتش ده رجعنى بالذاكرة لتصفيات كأس العالم 2002 مباراة مصر والسنغال فمصر واللى كسبناه 1/0 براسية ميدو وقتها وملعبناش ببصلة وطحنونا هنا الجيل الذهبي بتاعهم الحج ضيوف وكمارا وسيسيه المدرب الحالى ليهم واللى همه صعدوا لكأس العالم عن المجموعة فالنهاية رغم أن احنا تعادلنا معاهم اول مباراه هناك بس وقتها كان نظام مجموعة يصعد منها فريق واحد وكان معانا عقدتنا وقتها المغرب اللى تعادلنا معاهم فمصر وخسرنا بجون مصطفى حجى هناك والجزائر اللى كسبناهم 5/2هنا فمباراه التليفزيون فضل يحتفل بعدها كأننا صعدنا كاس العالم خلاص وكان فالمجموعة ناميبيا الضعيفة وقتها واللى تعادلنا معاها هناك 3/3 وكسبناها هنا 7 بعد خراب مالطا السنغال كانت جامدة وقتها وكسبت المغرب اللى كانت قوية وكانت آخر مباراه لينا مع الجزائر فالجزائر ولازم نكسب والسنغال متكسبش ناميبيا فى ناميبيا أو هندخل ففرق أهداف يعنى لازم نكسب الجزائر فرق اهداف إنا فاكر المباراة دى فى مدينة عنابة والجزائر وقتها كانت خسرانه من المغرب رايح جاى وضايعه وخرجت خلاص المنتخب اللى كان فيه مدربهم الحالي بلماضى والماتش ميفرقش معاهم بس بالنسبالهم اهم حاجه احنا منصعدش وضيعنا اهداف متضيعش وبالذات كورة ياسر رضوان اللى مش فاهم ازاى وهو على خط المرمى طلع الكورة فوق العارضة المهم كلنا فالماتش ده ضرب وصواريخ ودخان وكانت حرب والمباراه وقفت اكتر من نص ساعه وفالنهاية اتعادلنا والسنغال كسبت ناميبيا و5/0 فناميبيا وصعدت كاس العالم 2002 وشرفتنا ووصلت لدور ال8 صعد الأحق وقتها رغم أن احنا فمجموع مباراتينا معاهم لينا افضليه بس كان نظام مجموعة..يااااه ذكريات فات 20 سنه عالوقت ده.. كأنه امبارح ربنا يسترها حقيقة همه افضل وحرام ميروحوش كاس عالم القرعة ظلمتنا لما وقعتنا معاهم فالوقت اللى تونس صعودها اسهل ما يكون.. انا مصرى وبشجع مصر وباذن الله المرة دى نصعد كاس العالم